ములుగు, వెలుగు : ప్రతి ఒక్కరూ ఆర్థిక అక్షరాస్యతపై అవగాహన పెంచుకొని క్రమశిక్షణ పాటించాలని కలెక్టర్ ఇలా త్రిపాఠి సూచించారు. మంగళవారం ఆర్థిక అక్షరాస్యత వారోత్సవాల్లో భాగంగా కలెక్టరేట్ నుంచి బండారుపల్లి గిరిజన భవన్ వరకు 2కే రన్ నిర్వహించారు. ఈ సందర్భంగా కలెక్టర్ మాట్లాడుతూ.. రిజర్వ్ బ్యాంక్ ఆఫ్ ఇండియా ఆధ్వర్యంలో ఈనెల 26 నుంచి మార్చి 2 వరకు ఆర్థిక అక్షరాస్యత వారోత్సవాన్ని నిర్వహిస్తున్నామన్నారు.
ప్రజలు ఆర్థిక వ్యవహారాలపట్ల అవగాహన పెంచుకోవాలన్నారు. కుటుంబ పోషణ, వ్యాపారాలు, ఇతర ఖర్చులపై క్రమశిక్షణ పాటిస్తూ పొదుపుకోసం కృషి చేయాలని సూచించారు. ఆర్థిక క్రమశిక్షణ ద్వారా ఎంతో ఎదుగుదల సాధ్యమవుతుందని కలెక్టర్ వివరించారు. ఎల్డీఎం రాజ్ కుమార్, డీఆర్డీవో శ్రీనివాస్, సిబ్బంది పాల్గొన్నారు.
