మహబూబ్నగర్/జడ్చర్ల టౌన్, వెలుగు : తెలంగాణలోని యువత ఆకాంక్షలను సీఎం కేసీఆర్ కాలరాస్తున్నరని కాంగ్రెస్ నేత రాహుల్ గాంధీ మండిపడ్డారు. విద్యా వ్యవస్థను ప్రైవేటుపరం చేస్తూ పేదలకు చదువును దూరం చేస్తున్నరని విమర్శించారు. ‘భారత్ జోడో’ యాత్ర శనివారం ఉదయం 6 గంటలకు మహబూబ్నగర్ జిల్లా ధర్మాపూర్ మండలం నుంచి ప్రారంభమై.. సాయంత్రం 7గంటలకు జడ్చర్ల మండలం గొలపల్లి దగ్గరున్న లలితాంబిక టెంపుల్కు చేరుకుంది. సాయంత్రం జడ్చర్ల ఫ్లైఓవర్ వద్ద ఏర్పాటు చేసిన కార్నర్ మీటింగ్లో రాహుల్ మాట్లాడారు. బడ్జెట్లో కేసీఆర్ ప్రభుత్వం విద్యా రంగానికి తక్కువ నిధులు కేటాయిస్తున్నదని విమర్శించారు. తాము అధికారంలోకి వస్తే భారీగా నిధులు కేటాయిస్తామని, అప్పుడు స్టూడెంట్లు, వారి కలలను సాకారం చేసుకోవచ్చని చెప్పారు. ‘‘ఈ రోజు నేను ఓ యువకుడిని కలిశాను. అతను మెకానికల్ ఇంజనీరింగ్ చదవాలనుకున్నాడు. రాష్ర్ట ప్రభుత్వం రీయింబర్స్మెంట్ ఇవ్వకపోవడంతో మధ్యలోనే చదువు మానేసి జొమాటోలో డెలివరీ బాయ్గా పని చేస్తున్నాడు”అని రాహుల్ చెప్పారు.
మేము అధికారంలోకొస్తే పరిహారం ఇస్తం
రాష్ర్ట ప్రభుత్వం ప్రాజెక్టుల పేరుతో కోట్ల రూపాయలు దుర్వినియోగం చేస్తున్నదని రాహుల్ విమర్శించారు. వాటిని పూర్తి చేయకుండా నిర్లక్ష్యం చేస్తున్నదని మండిపడ్డారు. దేశంలో చేనేత వస్ర్తాలకు మంచి గుర్తింపు ఉందన్నారు. లక్ష మంది ఈ రంగంపైనే ఆధారపడి ఉన్నారని తెలిపారు. కేంద్ర ప్రభుత్వం విధిస్తున్న 12శాతం జీఎస్టీతో చేనేత కార్మికులు తీవ్ర ఇబ్బందులు ఎదుర్కొంటున్నారన్నారు. తాము అధికారంలోకి వచ్చిన వెంటనే కార్మికులకు పరిహారం ఇస్తామని హామీ ఇచ్చారు. ఇండియాను బీజేపీ విడగొట్టే ప్రయత్నం చేస్తున్నదని రాహుల్ ఆరోపించారు. పేదల డబ్బును కార్పొరేట్ చేతుల్లో పెడుతున్నదని విమర్శించారు. బీజేపీ, టీఆర్ఎస్లు బిజినెస్ పార్టీలు అని ఎద్దేవా చేశారు. కార్యక్రమంలో కేంద్ర మాజీ మంత్రి జైరామ్ రమేశ్, దిగ్విజయ్ సింగ్, టీపీసీసీ చీఫ్ రేవంత్రెడ్డి, షబ్బీర్ అలీ, మల్లు భట్టి విక్రమార్క, పొన్నం ప్రభాకర్, మధు యాష్కీ, మహేశ్గౌడ్, జనంపల్లి అనిరుధ్రెడ్డి పాల్గొన్నారు.
‘పాలమూరు-రంగారెడ్డి’పై రాహుల్ ఆరా
పాలమూరు–రంగారెడ్డి ఎత్తిపోతల పథకం గురించి రాహుల్ ఆరా తీశారు. ప్రాజెక్టు పూర్తికాకపోవడానికి గల కారణాలను ‘పాలమూరు అధ్యయన వేదిక’ అధ్యక్షుడు ప్రొఫెసర్ హరగోపాల్, ఉమ్మడి పాలమూరు జిల్లా కన్వీనర్ రాఘావచారిని అడిగి తెలుసుకున్నారు. లంచ్ అవర్లో వారితో సమావేశం అయ్యారు. 8ఏండ్లలో 30శాతం పనులు కూడా కంప్లీట్ కాలేదని వేదిక నేతలు రాహుల్కు వివరించారు. సాగునీరు లేక ఉమ్మడి మహబూబ్నగర్ జిల్లాలోని కోయిల్కొండ, గండీడ్, మహ్మదాబాద్, మద్దూరు తదితర ఏరియాల నుంచి లక్షల మంది వలస పోతున్నారని చెప్పారు. ఈ సందర్భంగా అధ్యయన వేదిక రూపొందించిన కరపత్రాన్ని రాహుల్కు అందజేశారు.
పాదయాత్రలో నటి పూనమ్ కౌర్
యాత్రలో భాగంగా రాహుల్గాంధీతో సినీ నటి పూనమ్కౌర్ భేటీ అయ్యారు. కేంద్ర, రాష్ట్ర ప్రభుత్వాల వైఖరితో చేనేత కార్మికుల ఇబ్బందులను రాహుల్ దృష్టికి తీసుకెళ్లారు. చేనేత కార్మికులను కళాకారులుగా గుర్తించాలని కోరారు. చేనేత సమస్యలను పార్లమెంట్లో ప్రస్తావించాలని కోరినట్టు పూనమ్ కౌర్ మీడియా పాయింట్లో వెల్లడించారు. హ్యాండ్లూమ్పై విధించిన జీఎస్టీతో కార్మికులు ఆర్థికంగా నష్టపోతున్నారని, వ్యాపారాలు చేసుకోలేక ఇబ్బందిపడుతున్నారని అన్నారు. జీఎస్టీ ఎత్తేయాలని కోరుతూ 66మంది ఎంపీలను కలిసినట్టు వివరించారు. దీనికి మద్దతుగా వారి నుంచి సంతకాలు సేకరించినట్టు వివరించారు.
