పద్మారావునగర్, వెలుగు: చిరు వ్యాపారాలు చేసి పొట్టపోసుకుంటున్న వారి పొట్ట కొట్టొద్దని మెట్టుగూడ కార్పొరేటర్ రాసూరి సునీత కోరారు. మెట్టుగూడలోని దాదాపు 150 స్ట్రీట్ వెండర్ల దుకాణాలను తొలగించడంతో శుక్రవారం సికింద్రాబాద్ జోనల్ కమిషనర్ కార్యాలయం ఎదుట ఆందోళన నిర్వహించారు. ఈ సందర్భంగా ఆమె మాట్లాడుతూ.. గతంలో బీఆర్ఎస్ ప్రభుత్వం స్ర్టీట్ వెండర్స్ కు అండగా ఉంటే, ప్రస్తుత కాంగ్రెస్ ప్రభుత్వం వారి జీవనోపాధిని కాలరాస్తోందని మండిపడ్డారు. వారికి మున్సిపల్ కార్పొరేషన్ నుంచి ఐడీ కార్డులు సైతం ఇచ్చారని, అవేమీ పట్టించుకోకుండా పోలీసులు దుకాణాలను తొలగిస్తున్నారని ఆరోపించారు. ప్రభుత్వం స్పందించి వారిని ఆదుకోవాలని సునీత కోరారు.
