ఏపీ, తెలంగాణలకు సంబంధించి గ్రాడ్యుయేట్ ఎమ్మెల్సీ ఎన్నికల షెడ్యూల్‌ను కేంద్ర ఎన్నికల సంఘం విడుదల చేసింది. ఏపీలో రెండు, తెలంగాణలో రెండు ఎమ్మెల్సీ స్థానాల పదవీకాలం మార్చి 29, 2021న ముగియనుంది. ఏపీలోని తూర్పు-పశ్చిమ గోదావరి జిల్లాల గ్రాడ్యుయేట్ ఎమ్మెల్సీ రాము సూర్యా రావు మరియు కృష్ణా-గుంటూరు జిల్లాల గ్రాడ్యుయేట్ ఎమ్మెల్సీ ఎ.ఎస్. రామకృష్ణ స్థానాలు ఖాళీ కానున్నాయి. అదేవిధంగా తెలంగాణలోని మహబూబ్‌నగర్-రంగారెడ్డి-హైదరాబాద్ గ్రాడ్యుయేట్ ఎమ్మెల్సీ ఎన్. రాంచందర్ రావు మరియు వరంగల్-ఖమ్మం-నల్గొండ ఎమ్మెల్సీ పల్లా రాజేశ్వర్ రెడ్డి స్థానాలు ఖాళీ కానున్నాయి.
ఈ నాలుగు స్థానాలకు కేంద్ర ఎలక్షన్ కమిషన్ షెడ్యూల్‌ను విడుదల చేసింది. ఈ ఎన్నికలకు సంబంధించి ఫిబ్రవరి 16న నోటిఫికేషన్ వెలువడనుంది. అభ్యర్థుల నామినేషన్ దాఖలుకు ఫిబ్రవరి 23ను ఆఖరు తేదీగా ప్రకటించారు. ఫిబ్రవరి 24న అభ్యర్థుల నామినేషన్లను ఎన్నికల అధికారులు పరిశీలించనున్నారు. నామినేషన్ల ఉపసంహరణ గడువు ఫిబ్రవరి 26గా తెలిపారు. ఈ నాలుగు స్థానాలకు మార్చి 14న పోలింగ్ జరగనుంది. ఉదయం 8 నుంచి సాయంత్రం 4 గంటల వరకు ఓటింగ్‌కు అవకాశం కల్పించారు. అనంతరం మార్చి 17న కౌంటింగ్ జరిపి ఫలితాలు వెల్లడించనున్నారు. కాగా.. ఎన్నికలు జరగనున్న ప్రాంతాల్లో తక్షణం ఎన్నికల కోడ్ అమలులోకి రానున్నట్లు ఎన్నికల సంఘం తెలిపింది.
For More News..
