- వైజాగ్ నుంచి మహారాష్ట్రకు తరలిస్తుండగా పట్టుకున్న రాచకొండ పోలీసులు
- ఆరుగురు అరెస్ట్.. 200 కిలోల సరుకు, 2 కార్లు సీజ్
ఎల్బీనగర్, వెలుగు: విత్తనాల మధ్యలో గంజాయిని ఉంచి వైజాగ్ నుంచి మహారాష్ట్రకు తరలిస్తున్న ఆరుగురిని రాచకొండ ఎస్వోటీ, చౌటుప్పల్ పోలీసులు అరెస్ట్ చేశారు. మంగళవారం ఎల్బీనగర్లోని రాచకొండ కమిషనరేట్ క్యాంప్ ఆఫీసులో సీపీ డీఎస్ చౌహాన్ వివరాలు వెల్లడించారు. మహారాష్ట్రకు చెందిన వివేక్ మోహన్(36), గణేవ్ మారుతీరావ్(32), సచిన్ సురేశ్(32), సంతోశ్బహర్త్(32), సామ్రాట్ సురేంద్ర(40), బిల్ అశోక్(45) ఓ గ్యాంగ్ గా ఏర్పడి ఈజీమనీ కోసం గంజాయిని సప్లయ్ చేయడం మొదలుపెట్టారు. ఏపీలోని వైజాగ్ ఏజెన్సీ ఏరియా సీలేరులో గంజాయిని కిలో రూ.3 వేలకు కొని దాన్ని మహారాష్ట్రకు తరలించి అక్కడ రూ.20 వేలకు అమ్ముతున్నారు.
ఈ గ్యాంగ్ గురించి తెలుసుకున్న రాచకొండ ఎస్వోటీ, చౌటుప్పల్ పోలీసులు వీరిపై నిఘాపెట్టారు. మంగళవారం చౌటుప్పల్ పరిధిలోని టోల్ గేట్ వద్ద 2 కార్లను ఆపి తనిఖీ చేశారు. విత్తనాల మధ్యలో గంజాయిని తరలిస్తున్నట్లు గుర్తించి ఆరుగురిని అదుపులోకి తీసుకున్నారు. 200 కిలోల గంజాయి, 2 కార్లను స్వాధీనం చేసుకున్నారు. గంజాయిని తరలించే సమయంలో నిందితులు కారు నంబర్ ప్లేట్ను మారుస్తున్నారని సీపీ చౌహాన్ తెలిపారు. ఈ కేసుకు సంబంధించి మరో ఇద్దరు నిందితులు పరారీలో ఉన్నారని ఆయన చెప్పారు.
