హైదరాబాద్, వెలుగు: తొమ్మిదేండ్లలో నిరుద్యోగులను సీఎం కేసీఆర్ నిండా ముంచేశారని కాంగ్రెస్ఎంపీ కోమటిరెడ్డి వెంకట్ రెడ్డి మండిపడ్డారు. టీచర్ పోస్టుల విషయంలో నిర్లక్ష్యం చేశారని ఆరోపించారు. వేల సంఖ్యలో టీచర్ పోస్టులు ఖాళీగా ఉన్నా భర్తీ చేయడం లేదన్నారు. వారం రోజుల్లోగా డీఎస్సీ నోటిఫికేషన్ ప్రకటించాలని, లేదంటే లక్ష మందితో ప్రగతి భవన్ను ముట్టడిస్తామని హెచ్చరించారు.
ఈ మేరకు మంగళవారం ఆయన సీఎం కేసీఆర్కు బహిరంగ లేఖ రాశారు. టెట్ రాసిన అభ్యర్థులు డీఎస్సీ నోటిఫికేషన్ కోసం కళ్లు కాయలు కాసేలా ఎదురుచూస్తున్నారని పేర్కొన్నారు. రాష్ట్రంలో రిటైర్ అవుతున్న టీచర్ల సంఖ్య నానాటికీ పెరుగుతున్నా.. వారి స్థానంలో కొత్తోళ్లను తీసుకోవాలన్న సోయి కూడా ప్రభుత్వానికి లేకుండా పోయిందని విమర్శించారు. డీఎస్సీ కోసం ఏండ్ల తరబడి అభ్యర్థులు ఎదురు చూస్తున్నారని, వారిలో ఏజ్ దాటి పోతున్నోళ్లున్నారని ఆందోళన వ్యక్తం చేశారు. దశాబ్ది ఉత్సవాల పేరుతో రోజుకో ఆర్భాటం చేసిన ప్రభుత్వం.. నిరుద్యోగుల సమస్యల గురించి ఎందుకు పట్టించుకోవడం లేదని ప్రశ్నించారు.
2020 డిసెంబర్లో అసెంబ్లీ సాక్షిగా సీఎం కేసీఆర్ టీచర్ పోస్టుల భర్తీపై ప్రకటన చేశారని వెంకట్రెడ్డి గుర్తు చేశారు. ఉమ్మడి ఏపీలో కాంగ్రెస్ హయాంలో ఆరు నెలలకోసారి టెట్, రెండేండ్లకోసారి డీఎస్సీ నోటిఫికేషన్లను ఇచ్చామన్నారు. కానీ, బీఆర్ఎస్ హయాంలో బీఈడీ, డీఈడీ అభ్యర్థులు ధర్నాల కోసం రోడ్డెక్కాల్సిన పరిస్థితి ఏర్పడిందన్నారు.
