న్యూఢిల్లీ: జీఎస్టీ వసూళ్ల విలువ గత నెల రూ.2.43 లక్షల కోట్లకు చేరి సరికొత్త రికార్డును సృష్టించింది. గత ఏప్రిల్లో వసూలైన రూ.2.23 లక్షల కోట్లతో పోలిస్తే ఇది 8.7 శాతం ఎక్కువ. దిగుమతుల ద్వారా వచ్చే ఆదాయం పెరగడం వల్ల ఈ భారీ వసూళ్లు సాధ్యమయ్యాయి. దేశీయ లావాదేవీల ఆదాయం 4.3 శాతం పెరిగి రూ.1.85 లక్షల కోట్లు దాటింది. దిగుమతులపై జీఎస్టీ వసూళ్లు 25.8 శాతం వృద్ధి చెంది రూ.57,580 కోట్లకు చేరాయి.
ఈసారి కేంద్ర వస్తు సేవల పన్ను (సీజీఎస్టీ) వసూళ్లు రూ.52,140 కోట్లుగా ఉన్నాయి. రాష్ట్ర వస్తు సేవల పన్ను (ఎస్జీఎస్టీ) వసూళ్లు రూ.61,331 కోట్లుగా నమోదయ్యాయి.
సమగ్ర వస్తు సేవల పన్ను (ఐజీఎస్టీ) కింద రూ.1.29 లక్షల కోట్లు వచ్చాయి. పన్ను రీఫండ్లు 19.3 శాతం పెరిగి రూ.31,793 కోట్లకు చేరాయి. రీఫండ్లను సర్దుబాటు చేసిన తర్వాత నికర జీఎస్టీ వసూళ్లు 7.3 శాతం వృద్ధితో రూ.2.11 లక్షల కోట్లుగా నమోదయ్యాయి.
