హైదరాబాద్, వెలుగు: ప్రేమను వ్యక్తపరిచేందుకు ఉన్న ఓ రోజు ‘వాలంటైన్స్ డే’. గ్రేటర్లో వాలంటైన్స్ డే ను ప్రేమికులూ, పెళ్లయినవాళ్లూ ఎంతో స్పెషల్గా సెలబ్రేట్ చేసుకునేందుకు ప్లాన్స్ చేసుకుంటారు. ప్రస్తుతం సర్ప్రైజ్ సెలబ్రేషన్స్ ట్రెండ్ నడుస్తోంది. ‘కస్టమైజ్డ్ గిఫ్టింగ్’ పేరుతో.. మర్చిపోలేని గుర్తులతో గిఫ్ట్స్ ని తయారు చేయించి అందిస్తున్నారు. ప్రస్తుతం మార్కెట్లో ఈ గిఫ్టులకు మంచి క్రేజ్ఉంది. గిఫ్టులపై రకరకాల సందేశాలు రాయిస్తూ ప్రేమను వ్యక్తపరిచేందుకు రెడీ అవుతున్నారు. అప్పట్లో లవ్ లెటర్ ఇస్తూ ప్రేమను తెలియజేసేవారు. ఇప్పుడు కాస్త మాడ్రనైజ్ అయ్యింది. గులాబీలు, ఉత్తరాలు ఇచ్చి సరిపెట్టుకోకుండా.. గుర్తుండిపోయే గిఫ్టులు ఇచ్చి ఇంప్రెషన్ కొట్టేయాలని చూస్తున్నారు. అభిరుచులకు, ఆలోచనలకు తగ్గట్టు పర్సనలైజ్డ్ గిఫ్ట్లూ వచ్చాయి. అమ్మాయికి లేదా అబ్బాయికి నచ్చేలా గిఫ్ట్లను తయారు చేయించి ఇస్తున్నారు. ఇవైతే ఎప్పటికీ గుర్తుండిపోతాయని భావిస్తున్నారు. కస్టమైజ్డ్ గిఫ్ట్లు ఆన్ లైన్లోనూ హవా చేస్తున్నాయి. రేటు ఎక్కువైనప్పటికీ స్పెషల్ అకేషన్ కావడంతో వీటిని కొనేందుకు ఇంట్రెస్ట్ చూపిస్తున్నారు. ఈ కస్టమైజ్డ్ గిఫ్ట్స్ చేసే వారికి ఆర్డర్లు కూడా ఎక్కువగానే వస్తున్నాయి.
ట్రెండ్ మారింది..
గతంలో వాలంటైన్స్ డే సెలబ్రేషన్ అంటే ఇష్టమైన వాళ్లని కలిసి గిఫ్ట్ కార్డ్, రోస్ ఫ్లవర్ , చాక్లెట్లు, కేకులతో ప్రేమ పండుగ జరుపుకొనేవారు. ప్రస్తుతం ట్రెండ్ మారింది. ప్రేమను వ్యక్తపరచడంలో మార్పులు వచ్చాయి. లవర్స్కు తగ్గట్లే.. సిటీలో క్యాండిల్ లైట్ డిన్నర్ లొకేషన్లు, థీమెటిక్ రెస్టారెంట్లు, సర్ప్రైజ్ పార్టీల కోసం స్పెషల్ ప్లేస్లు వచ్చేశాయి. వాలంటైన్స్ డే సెలబ్రేషన్స్ కోసం బేకరీలు, రెస్టారెంట్లు, షాపింగ్ మాల్స్ను అందంగా తయారు చేస్తున్నారు. మెనూ చార్టులు, ప్రైస్ లిస్టుల స్థానంలో ప్రేమ సందేశాలు రాసి.. కొత్త జంటల్ని ఇన్వైట్ చేస్తున్నారు ఓనర్లు. గిఫ్ట్ స్టోర్లలో యూనిక్ ఐటెమ్స్ ను ఉంచుతున్నారు. గిఫ్ట్ కార్డ్స్ నుంచి కస్టమైజ్డ్ వరకూ.. స్వచ్ఛమైన ప్రేమకు ముచ్చటైన బహుమతులుగా నిలవనున్నాయి.
కపుల్ నేమ్స్తో..
చాక్లెట్ మీద కపుల్ నేమ్స్తో పాటు వాళ్ల మెసేజ్ రాయించుకుంటున్నారు. నాలుగైదు రోజుల నుంచి దాదాపు 500 ఆర్డర్లు వచ్చాయి. వంద గ్రాముల చాక్లెట్ నుంచి కిలో చాక్లెట్ వరకూ అందుబాటులో ఉన్నాయి. ఫ్లేవర్ను బట్టి రూ.150 నుంచి రూ.1500 వరకు రేటు ఉంది. సర్ ప్రైజ్ గిఫ్ట్లను డోర్ డెలివరీ చేస్తున్నాం.
- సత్య, లవ్లీ చాకోస్ వెబ్ సైట్ ఓనర్
