రంగారెడ్డి జిల్లా: హైదరాబాద్లో ఆక్రమణలపై హైడ్రా కొరడా ఝుళిపించింది. అక్కమార్కులు బొక్కేయకుండా భూములను కాపాడే పనిలో హైడ్రా సీరియస్గా ముందుకెళుతోంది. గండిపేట మండలంలోని పుప్పాలగూడలో ఉన్న ప్రభుత్వ భూమిని హైడ్రా కమిషనర్ రంగనాథ్ బుధవారం పరిశీలించారు. 2 వందల ఎకరాలకు పైగా ఉన్న ప్రభుత్వ భూమి కబ్జా కాకుండా చుట్టూ కంచె ఏర్పాటు చేస్తామని ఈ సందర్భంగా హైడ్రా కమిషనర్ తెలిపారు. ఇక్కడ దేవాలయాలకు, దర్గాకు 10 ఎకరాల వరకూ భూమి ఇచ్చినట్టు చెబుతున్నారని.. దీనిని కూడా రెవెన్యూ వాళ్లతో కలిసి పరిశీలిస్తామని ఆయన చెప్పారు. ఆ మేరకు హద్దులు నిర్ధారించి త్వరలో కంచెలు వేస్తామని స్థానికులకు హామీ ఇచ్చారు.
452/1, 454/1 సర్వే నంబర్లలో ఉన్న కొండలను పరిరక్షించాలని కోరుతూ హైడ్రాకు సేవ్ రాక్స్ సొసైటీ ప్రతినిధులు కోరారు. ఎంతో ఎత్తుగా.. సహజ సిద్ధంగా ఉన్న గుట్టలను, సంవత్సరాల చరిత్ర గల కొండలను కాపాడితే.. ప్రకృతిని పరిరక్షించనవాళ్లం అవుతామని రంగనాథ్ ఈ సందర్భంగా చెప్పారు. ఇక్కడ ఎలాంటి నిర్మాణాలు చేపట్టకూడదనే హైకోర్టు ఉత్తర్వులను కూడా పరిశీలిస్తామని హైడ్రా కమిషనర్ తెలిపారు. ఈ గుట్టలను ఆనుకుని ఉన్న భగీరథమ్మ చెరువును కూడా పరిరక్షించాలని రంగనాథ్ను స్థానికులు కోరారు.
అయితే.. గతంలో కూడా భగీరథమ్మ చెరువు కబ్జాలపై హైడ్రా చర్యలు తీసుకుంది. ఖాజాగూడ మెయిన్రోడ్డుకు ఆనుకొని ఉన్న భగీరథమ్మ చెరువు శిఖం స్థలాన్ని కొందరు కబ్జా చేస్తున్నారని గుర్తించిన హైడ్రా అధికారులు రాయదుర్గం పోలీసులకు ఫిర్యాదు చేశారు. విచారణ చేపట్టిన పోలీసులు మట్టిపోసి చదును చేస్తున్నవారిని, జేసీబీ ఓనర్సురేశ్ను అరెస్ట్చేశారు.
