- తక్షణ సాయం కింద రూ. 1.5 లక్షలు ప్రకటించిన ఉత్తరాఖండ్ సీఎం
- రెండు హోటళ్ల నే కూలుస్తామన్న సీఎం సెక్రటరీ
జోషిమఠ్: ఉత్తరాఖండ్ చమోలి జిల్లాలోని జోషిమఠ్ పట్టణంలో నేల కుంగిపోవడం వల్ల దెబ్బ తిన్న ఇండ్లను ఖాళీ చేస్తున్న కుటుంబాలకు మార్కెట్ రేట్ ప్రకారమే నష్ట పరిహారం చెల్లిస్తామని బుధవారం ఆ రాష్ట్ర సీఎం పుష్కర్ సింగ్ ధామి ప్రకటించారు. వివిధ వర్గాలను సంప్రదించిన తర్వాత మార్కెట్ రేట్ను నిర్ణయిస్తామని వెల్లడించారు. తక్షణ సాయం కింద బాధిత కుటుంబాలకు రూ. 1.5 లక్షల చొప్పున అందజేయనున్నట్లు తెలిపారు. అద్దె ఇండ్లలోకి మారే కుటుంబాలకు ఆరు నెలల పాటు నెలకు రూ. 4 వేల చొప్పున కూడా ఇస్తామన్నారు. కూల్చివేతల భయంతో స్థానికులు మంగళవారం రాత్రంతా తమ బిల్డింగ్ల ముందే చలిలో కాపుకాశారు. సీఎం ప్రకటనతో స్థానికులకు కొంచెం ఊరట లభించినట్లయింది.
131 బిల్డింగ్ లు అన్ సేఫ్
జోషిమఠ్ పట్టణంలో మొత్తం 723 బిల్డింగ్లకు బీటలు వచ్చాయని, ప్రస్తుతానికి రెండు హోటల్స్ ను తప్ప ఇతర బిల్డింగ్లను కూల్చివేయడంలేదని సీఎం సెక్రటరీ మీనాక్షి సుందరం తెలిపారు. మొత్తం 131 బిల్డింగ్ లను అన్ సేఫ్గా గుర్తించి మార్కింగ్ చేశామని, వీటిలోని ఫ్యామిలీలనే సేఫ్ ప్లేస్ లకు తరలిస్తున్నామని చెప్పారు. పట్టణంలో ఈ నెల 7 తర్వాత ఇండ్లకు కొత్తగా బీటలు రాలేదని, ఉన్న బీటలు కూడా పెద్దవి కాలేదన్నారు.
అర్ధరాత్రి యథేచ్ఛగా స్టోన్ క్రషింగ్
జోషిమఠ్, పరిసర ప్రాంతాల్లో కన్ స్ట్రక్షన్, డ్రిల్లింగ్ వంటి పనులపై ప్రభుత్వం నిషేధం విధించినా.. బద్రీనాథ్కు వెళ్లే హైవే వద్ద మంగళవారం అర్ధరాత్రి తర్వాత యథేచ్ఛగా పనులు జరిగాయి. ఓ కంపెనీకి చెందిన సిబ్బంది స్టోన్ క్రషింగ్ మెషీన్లు, డ్రిల్లింగ్, క్రేన్లతో యధావిధిగా పనులు చేపట్టడాన్ని నేషనల్ మీడియా బయటపెట్టింది.
