డెట్రాయిట్: ఫేషియల్ రికగ్నిషన్ టెక్నాలజీ అమెరికాలో కలకలం సృష్టిస్తున్నది. సామాన్య సిటిజన్స్ ఈ టెక్నాలజీపై ఆందోళన వ్యక్తం చేస్తున్నారు. అమాయకులను సైతం పోలీసులు నేరస్థులుగా అనుమానిస్తూ అరెస్టు చేస్తున్నారు. నేరస్థులను గుర్తించే ఫేషియల్ రికగ్నిషన్ లో పొరపాటు కారణంగా నిర్దోషి అయిన ఓ ప్రెగ్నెంట్ను పోలీసులు అరెస్టు చేశారు. ఈ సంఘటన అమెరికాలోని డెట్రాయిట్లో నిరుడు ఫిబ్రవరి 16న జరిగింది. ఎనిమిది నెలల గర్భిణి వుడ్రఫ్ (32) ఇంట్లో ఉండగా కారు దొంగతనం, దోపిడీకి పాల్పడినట్లు ఆరోపిస్తూ పోలీసులు అరెస్టు వారెంట్అందజేశారు.
తన ఇద్దరు కుమార్తెలను స్కూల్కు తీసుకువెళ్లేందుకు రెడీ అవుతుండగా పోలీసులు అరెస్టు వారెంట్ ఇవ్వడంతో జోక్ చేస్తున్నారని వుడ్రఫ్ భావించింది. అయితే ఆమెను అరెస్టు చేసిన పోలీసులు డెట్రాయిట్ డిటెన్షన్ సెంటర్కు తరలించారు. సుమారు 11గంటలపాటు ఆమెను ప్రశ్నించారు. ఆమె ఐఫోన్ను స్వాధీనం చేసుకుని, లక్ష డాలర్ల పర్సనల్ బాండ్ తీసుకుని ఆమెను విడుదల చేశారు.
నెల రోజుల తర్వాత కేసును కొట్టివేశారు. డెట్రాయిట్ పోలీసులు తనను అక్రమంగా అరెస్టు చేయడంతో ఆమె కోర్టులో కేసు ఫైల్ చేసింది. ఫేషియల్ రికగ్నిషన్లో జరిగిన పొరపాటు కారణంగా పోలీసులు తనను అరెస్టు చేశారని వుడ్రఫ్ గుర్తించిందని ఎన్బీసీ న్యూస్ నివేదించింది.