- తీర్పు సవరించాలంటే ముగ్గురు జడ్జీలుండాలన్న సుప్రీం కోర్టు
న్యూఢిల్లీ, వెలుగు: నీట్ కౌన్సెలింగ్ స్థానికత వ్యవహారంలో దాఖలైన పిటిషన్పై విచారణను సుప్రీం కోర్టు సోమవారానికి వాయిదా వేసింది. వైద్య విద్య ప్రవేశాల్లో స్థానికతకు సంబంధించి తాజాగా రాష్ట్ర ప్రభుత్వం జీవో 33ని తీసుకొచ్చింది. నీట్కు ముందు నాలుగేండ్లు లోకల్ గా చదవాలని, లేదా నివాసం ఉండాలని జీవో 33లోని నిబంధన 3 (ఏ) కింద చేర్చింది. అయితే, ఈ నిబంధనను సవాల్ చేస్తూ హైదరాబాద్ కు చెందిన కె.నాగ నరసింహ అభిరామ్, మరికొందరు హైకోర్టును ఆశ్రయించారు.
ఈ పిటిషన్ ను విచారించిన హైకోర్టు.. స్టూడెంట్లకు అనుకూలంగా తీర్పు ఇచ్చింది. ఈ ఆదేశాలను సవాల్ చేస్తూ.. తెలంగాణ ప్రభుత్వం ఈ నెల 11వ తేదీన సుప్రీం కోర్టును ఆశ్రయించింది. గత విచారణ సందర్భంగా ఒకసారి మినహాయింపు కింద హైకోర్టును ఆశ్రయించిన 135 మంది విద్యార్థులు.. కౌన్సెలింగ్ కు హాజరయ్యేందుకు రాష్ట్ర ప్రభుత్వం అంగీకరించింది. దీంతో ఈ 135 మంది కౌన్సెలింగ్కు హాజరయ్యేందుకు అవకాశం కల్పించడంతో పాటు, హైకోర్టు తీర్పుపై సుప్రీం కోర్టు సీజేఐతో కూడిన బెంచ్ మధ్యంతర స్టే ఇచ్చింది.
అయితే, శుక్రవారం మరోసారి ఈ పిటిషన్ సీజేఐ జస్టిస్ డీవై చంద్రచూడ్, జస్టిస్ మనోజ్ మిశ్రాతో కూడిన ధర్మాసనం ముందుకు వచ్చింది. ఈ సందర్భంగా అడ్వొకేట్లు వాదిస్తూ హైకోర్టును ఆశ్రయించిన 135 మంది విద్యార్థులకు మాత్రమే కౌన్సెలింగ్కు అవకాశం కల్పించడం సరికాదన్నారు.
ఇతర విద్యార్థులకు తీవ్ర అన్యాయం జరుగుతుందని వాదించారు. హైకోర్టు ఆదేశాల మేరకు స్టూడెంట్లందరికీ కౌన్సెలింగ్కు అనుమతి ఇవ్వాలని కోరారు. స్పందించిన సీజేఐ చంద్రచూడ్.. గత తీర్పును సవరించాలంటే ఆ బెంచ్ లోని ముగ్గురు జడ్జీలు ఉండాలన్నారు. జస్టిస్ జేబీ పార్ధివాలా లేకపోవడంతో విచారణను సోమవారానికి వాయిదా వేస్తున్నట్లు తెలిపారు.
