మహాముత్తారం, వెలుగు: ‘చిన్నగున్నపుడే తండ్రి చనిపోయాడు. కూలీ నాలీ చేసి తల్లి స్కూల్కు పంపింది. ఇంటర్ పూర్తి చేసి జేఈఈ అడ్వాన్స్ లో మంచి ర్యాంకు సాధించినప్పటికీ జాయిన్ అయ్యేందుకు ఫీజులు కట్టే పరిస్థితి లేదు. ఎవరైనా దాతలు ఆదుకోవాలి’ అంటూ జయశంకర్ భూపాలపల్లి జిల్లా మహాముత్తారం మండలం దొబ్బలపహాడ్కు చెందిన రామ్ నాయక్ వేడుకుంటున్నాడు. భరోత్ సమ్మయ్య, -ప్రమీల దంపతులకు ఇద్దరు కవలలు రామ్నాయక్.. లక్ష్మణ్నాయక్. తండ్రి యాక్సిడెంట్లో గాయపడి 2015లో మృతి చెందాడు. కూలీ డబ్బులతో తల్లి ప్రమీల ఇద్దరు కొడుకులను చదివించింది. కరీంనగర్ జిల్లాలోని ట్రెబల్ వెల్ఫేర్ కాలేజీలో ఇంటర్ పూర్తిచేశారు. ఈ ఇద్దరు గతేడాదిలో జరిగిన జేఈఈ అడ్వాన్స్ లో ఎస్టీ కేటగిరిలో రామ్నాయక్ 710, లక్ష్మణ్ నాయక్1673వ ర్యాంకు సాధించారు.
రామ్నాయక్కు కాన్పూర్ ఏరోస్పేస్ ఐఐటీ ఇంజనీరింగ్ సీటు కన్ఫాం అయింది. అందులో జాయిన్ కావాలంటే రూ. లక్ష, నాలుగేళ్లలో 4 లక్షల వరకు అవసరం ఉంటుందని మేనేజ్మెంట్ చెప్పడంతో తల్లి ప్రమీల సీటు రిజర్వేషన్ కోసం కూలిపని చేసి కూడబెట్టిన రూ. 15వేలను చెల్లించింది. దీంతో రామ్నాయక్ సాయం కోసం ఎదురు చూస్తున్నాడు. ఎవరైనా దాతలు సాయం చేస్తే చదువుకుని మంచి పేరు తెస్తానని వేడుకుంటున్నాడు.
