రాజన్నసిరిసిల్ల, వెలుగు: ప్రభుత్వం నేరెళ్ల బాధితులకు న్యాయం చేయకపోతే హైదరాబాద్ వేదికగా ధర్నా చేస్తానని టీఆర్పీ అధినేత తీన్మార్ మల్లన్న హెచ్చరించారు. బుధవారం ఆయన రాజన్నసిరిసిల్ల జిల్లాలో పర్యటించారు. ఇల్లంతకుంట మండలం రామోజిపేటలోని శ్రీసీతారామచంద్రస్వామి ఆలయంలో పూజలు నిర్వహించారు. పెద్దలింగాపూర్ రైతులు చేపట్టిన రిలే దీక్ష శిబిరాన్ని సందర్శించి మద్దతు తెలిపారు.
అనంతరం తంగళ్లపల్లి మండలంలోని నేరెళ్ల బాధితులను కలిశారు. ఈ సందర్భంగా మల్లన్న మాట్లాడుతూ, నేరెళ్ల బాధితులపై థర్డ్ డిగ్రీ ప్రయోగించి హింసించిన అధికారులకు ప్రమోషన్లు లభించాయన్నారు. ప్రతిపక్షంలో ఉన్నప్పుడు అండగా ఉంటామని చెప్పిన వారు అధికారంలోకి రాగానే మాట మార్చారని విమర్శించారు. కాళేశ్వరం 11వ ప్యాకేజీ పనుల జాప్యంపై కేటీఆర్, మానకొండూర్ ఎమ్మెల్యే కవ్వంపల్లి సత్యనారాయణ ఎందుకు స్పందించడం లేదని మల్లన్న ప్రశ్నించారు. ఎల్ఎం- 6 కాలువ పనులు పూర్తైతే ఇల్లంతకుంట, తంగళ్లపల్లి మండలాల్లో సుమారు పది వేల ఎకరాలకు సాగునీరు అందుతుందని తెలిపారు. రైతులు నెల రోజులుగా దీక్షలు చేస్తున్నా ప్రభుత్వం పట్టించుకోవడం లేదని విమర్శించారు.
