హైదరాబాద్, వెలుగు: రిజర్వేషన్లతో సంబంధం లేకుండా తాము 50 శాతం సీట్లను మహిళలకు కేటాయిస్తామని టీఆర్ఎస్ చీఫ్ కల్వకుంట్ల కవిత అన్నారు. మహిళలు, బహుజనుల కోసంపాటు పడుతున్న తనను ఆశీర్వదించాలని కోరారు. మహిళా నాయకత్వాన్ని పెంపొందించడానికి తాను కృషి చేస్తున్నట్లు తెలిపారు. సోమవారం బంజారాహిల్స్ లోని పార్టీ ఆఫీసులో బతుకమ్మ వేడుకలు నిర్వహించారు.
ఈ సందర్భంగా మాట్లాడుతూ.. రాజకీయ పార్టీ ఏర్పాటు చేసిన తర్వాత పార్టీ ఆఫీస్ లో బతుకమ్మ సంబురాలు నిర్వహించడం ఎంతో సంతోషంగా ఉందన్నారు. ప్రపంచంలో ఎవరికీ లేని అత్యంత విశిష్టమైన బతుకమ్మ పండుగ తెలంగాణ సొంతమన్నారు. ప్రపంచానికి చాటేలా ఈ పండుగను జరుపుకుందామని పిలుపునిచ్చారు.
ప్రతి ఒక్కరూ బతుకమ్మ పాటలు నేర్చుకొని భవిష్యత్ తరాలకు అందజేయాలని సూచించారు. అప్పట్లో తెలంగాణ ఉద్యమ స్ఫూర్తికి బతుకమ్మ ప్రతీకగా నిలిచిందని గుర్తు చేశారు. గౌరమ్మ తల్లి ఆశీర్వాదంతో తెలంగాణ ఆడబిడ్డలందరూ ఆనందంగా ఉండాలని ఆకాంక్షించారు.
