న్యూఢిల్లీ, వెలుగు: దేశ రాజధానిలో కొండా లక్ష్మణ్ బాపూజీ జయంతి వేడుకలు ఘనంగా జరిగాయి. ఢిల్లీ తెలంగాణ భవన్లోని అంబేద్కర్ ఆడిటోరియంలో బుధవారం రాష్ట్ర ప్రభుత్వం ఈ వేడుకలను నిర్వహించింది. భవన్ రెసిడెంట్ కమిషనర్ డా. గౌరవ్ ఉప్పల్.. కొండా లక్ష్మణ్ బాపూజీ చిత్ర పటానికి పూలమాల వేసి నివాళులర్పించారు. కార్యక్రమంలో ఓఎస్డీ సంజయ్ జాజు, ఇతర అధికారులు, సిబ్బంది పాల్గొన్నారు. గౌరవ్ ఉప్పల్ మాట్లాడుతూ.. దేశ స్వాతంత్య్ర పోరాటంలో, ముల్కీ ఉద్యమంలో, నిజాం వ్యతిరేక పోరాటంలో, తెలంగాణ తొలి, మలి దశ ఉద్యమాల్లో కొండా లక్ష్మణ్ బాపూజీ కీలక పాత్ర పోషించారని గుర్తుచేశారు. తెలంగాణ సమస్యలపై జీవితాంతం పోరాటం చేసిన వ్యక్తి బాపూజీ అని.. రాష్ట్ర సాధన కోసం రాజీలేని పోరాటం చేశారని.. బడుగు బలహీన వర్గాల చైతన్యానికి, ఆత్మగౌరవానికి ప్రతీకగా నిలిచారని కొనియాడారు.
బాపూజీ స్ఫూర్తితో పయనిస్తాం: కాంగ్రెస్
కొండా లక్ష్మణ్ బాపూజీ చూపిన మార్గంలో పయనించి, ఆయన స్ఫూర్తితో బీసీ వర్గాల రాజకీయ హక్కుల కోసం పోరాడుతామని కాంగ్రెస్ బీసీ నేతలు అన్నారు. ఢిల్లీ తెలంగాణ భవన్లో కొండా లక్ష్మణ్ బాపూజీ చిత్రపటానికి వారు నివాళులర్పించారు. కార్యక్రమంలో నేతలు పొన్నాల లక్ష్మయ్య, వీహెచ్, కత్తి వెంకటస్వామి, కొనగల మహేశ్, మెట్టు సాయి, కత్తి కార్తీక తదితరులు పాల్గొన్నారు.
