కాంగ్రెస్ నాయకురాలు కొండా సురేఖ ప్రమాదానికి గురయ్యారు. కాంగ్రెస్ ఎంపీ రాహుల్ గాంధీ బైక్ ర్యాలీలో ఆమె స్కూటీ నడుపుతుండగా కిందపడిపోయారు. దీంతో ఆమెకు స్వల్ప గాయాలయ్యాయి.
తెలంగాణ ఎన్నికల వేళ రాహుల్ గాంధీ విజయభేరి పేరిట బస్సు యాత్రలో పాల్గొన్నారు. ఈ విజయభేరి యాత్రలో భాగంగా అక్టోబర్ 19వ తేదీన భూపాలపల్లి నుంచి కాంగ్రెస్ నాయకులు, కార్యకర్తలతో కలిసి రాహుల్ గాంధీ బైక్ ర్యాలీ చేపట్టారు. ఈ ర్యాలీలో కొండా సురేఖ కూడా పాల్గొన్నారు. అయితే స్కూటీ నడుపుతుండగా అదుపుతప్పడంతో కిందపడిపోయారు. దీంతో ఆమె ముఖంతో పాటు చేతులకు స్వల్ప గాయాలయ్యాయి. వెంటనే కాంగ్రెస్ కార్యకర్తలు ఆమెను ఆసుపత్రికి తరలించారు.
