- అధికారిక ప్రొగ్రామ్స్లో బీఆర్ఎస్ ఎమ్మెల్యేలు, మంత్రులు
- టికెట్ల కోసం ఢిల్లీ బాట పట్టిన కాంగ్రెస్ నాయకులు
- కొనసాగుతున్న బీజేపీ నేతల పల్లె బాట
మహబూబాబాద్, వెలుగు : ఏ క్షణమైనా ఎలక్షన్ నోటిఫికేషన్ వచ్చే అవకాశం ఉండడంతో ఉమ్మడి వరంగల్ జిల్లాలోని వివిధ పార్టీల నేతలు తమ కార్యక్రమాల్లో వేగం పెంచారు. ప్రారంభోత్సవాలు, శంకుస్థాపనలు, వివిధ స్కీముల్లో లబ్ధిదారులకు మంజూరు పత్రాలను బీఆర్ఎస్ ఎమ్మెల్యేలు, మంత్రులు, ఎమ్మెల్సీలు అందిస్తున్నారు. ఎమ్మెల్యే టికెట్ల కోసం కాంగ్రెస్ నేతలు హైదరాబాద్, ఢిల్లీలో గాడ్ ఫాదర్ల చుట్టూ తిరుగుతున్నారు. టికెట్ కన్ఫామ్ అనుకున్న బీజేపీ నాయకులు గ్రామాల్లో ప్రజల సమస్యలు తెలుసుకుంటున్నారు. అనుమానం ఉన్న బీజేపీ నేతలు హైదరాబాద్లోనే మకాం వేశారు.
స్పీడ్ అందుకున్న డెవలప్మెంట్ ప్రోగ్రామ్స్
మహబూబాబాద్ ఎమ్మెల్యే బానోతు శంకర్ నాయక్, డోర్నకల్ ఎమ్మెల్యే డీఎస్ రెడ్యానాయక్ ప్రతీ రోజూ రెండు, మూడు మండలాల పరిధిలో తిరుగుతూ శంకుస్థాపనలు, ప్రారంభోత్సవాలు చేస్తున్నారు. జిల్లా కేంద్రంలో సోమవారం రూ.12 కోట్ల అంచనా వ్యయంతో నిర్మించే తెలంగాణ గిరిజన సంక్షేమ రెసిడెన్షియల్ స్కూల్ కాంప్లెక్స్, రూ. 2 కోట్లతో నిర్మించే బంజారా భవన నిర్మాణ పనులకు మంత్రి సత్యవతి రాథోడ్, ఎమ్మెల్యే శంకర్ నాయక్, ఎమ్మెల్సీరవీందర్ రావు శంకుస్థాపన చేశారు. బీసీ బంధు పథకం కింద కొత్తగూడ, గంగారం లబ్ధిదారులకు మంత్రి చెక్కులను అందజేశారు.
జర్నలిస్టులకు ఇళ్ల స్థలాల పట్టాలను అందించారు. డోర్నకల్ నియోజక వర్గం పరిధిలో ఇటీవల రూ.36 కోట్లతో నిర్మించే 100 పడకల హాస్పిటల్కు, నర్సింహులపేట మండలంలో రూ.12 కోట్లతో నిర్మించే పనులకు ఎమ్మెల్యే రెడ్యానాయక్తో కలసి ఆరోగ్య శాఖ మంత్రి హరీశ్ రావు శంకుస్థాపన చేశారు. తొర్రూరు పట్టణంలో ఎస్డీఎఫ్ ఫండ్ రూ.25 కోట్లతో చేపట్టే పనులకు 4న పంచాయతీరాజ్ శాఖ మంత్రి ఎర్రబెల్లి దయాకర్ రావుచే శంకుస్థాపన కోసం ఏర్పాట్లు చేస్తున్నారు. రూ.23 కోట్లతో చేసే తొర్రూరు, హరిపిరాల రోడ్ విస్తరణ , సెంట్రల్ లైటింగ్ పనులను ప్రారంభించనున్నారు.
హస్తిన బాటలో కాంగ్రెస్ నాయకులు
మహబూబాబాద్ టికెట్ఆశిస్తున్న కేంద్ర మాజీ మంత్రి పోరిక బలరాం నాయక్, డాక్టర్ మురళీ నాయక్, బెల్లయ్య నాయక్, డోర్నకల్ అసెంబ్లీ టికెట్ ఆశిస్తున్న డాక్టర్ జాటోతు రామచంద్రు నాయక్, మాలోతు నెహ్రు నాయక్, కిసాన్ పరివార్ సంస్థ నిర్వాహకుడు భూపాల్ నాయక్ టికెట్ కోసం హైదరబాద్, ఢిల్లీకి తిరుగుతున్నారు. ఎమ్మెల్యే టికెట్ ఖరారు అయితేనే ప్రజల్లోకి వెళ్లాలనే ఆలోచనలో కాంగ్రెస్ నాయకులు ఉన్నారు.
గ్రామాల్లో బీజేపీ నేతల ప్రచారం షురూ
మహబూబాబాద్ అసెంబ్లీ పరిధిలో ఎమ్మెల్యే టికెట్ ఆశిస్తున్న బీజేపీ రాష్ట్ర ఎస్టీ మోర్చా అధ్యక్షుడు జాటోతు హుస్సేన్ నాయక్ నియోజకవర్గంలో పల్లె పల్లెకు బీజేపీ ప్రొగ్రామ్ నిర్వహిస్తున్నారు. డోర్నకల్ నియోజకవర్గంలో బీజేపీ టికెట్ను నర్సింహులపేట జడ్పీటీసీ భూక్య సంగీత, గుగులోతు లక్ష్మణ్ నాయక్, బానోతు ప్రభాస్నాయక్ ఆశిస్తున్నా ఎటువంటి ప్రచారం చేపట్టడం లేదు.
