- డీసీఎంను ఢీకొట్టడంతో నుజ్జునుజ్జయిన కారు
- ఒకరికి తీవ్ర, మరొకరికి స్వల్ప గాయాలు
జూబ్లీహిల్స్, వెలుగు: జూబ్లీహిల్స్ దివంగత మాజీ ఎమ్మెల్యే మాగంటి గోపీనాథ్ కుమార్తెలు ప్రయాణిస్తున్న కారు ఔటర్ రింగ్ రోడ్పై ప్రమాదానికి గురైంది. వీరిలో ఒకరికి తీవ్ర గాయాలు కాగా, మరొకరికి స్వల్ప గాయాలయ్యాయి. మాగంటి గోపీనాథ్ కుమార్తెలు అక్షర నాగ, దిశర తమ స్నేహితులు అరికపూడి దుర్గాసాయి, మేడిపల్లి అభిరామిరెడ్డితో కలిసి ఆదివారం రాత్రి శంషాబాద్ విమానాశ్రయానికి వెళ్లి తమ ఫ్రెండ్స్కు వీడ్కోలు పలికారు.
అనంతరం గచ్చిబౌలి వైపు ఔటర్ రింగ్ రోడ్ మీదుగా తమ ఫార్చునర్ కారులో తిరిగి బయల్దేరారు. ఈ క్రమంలో నార్సింగ్ పోలీస్ స్టేషన్ పరిధిలోని తెలంగాణ స్టేట్ పోలీస్ అకాడమీ చౌరస్తా దాటిన తర్వాత వీరి ముందు వెళ్తున్న డీసీఎం టైరు ఒక్కసారిగా ఊడిపోవడంతో ఆ వాహనం వేగం తగ్గి ఒక పక్కకు ఒరిగింది. అదే సమయంలో వెనుక నుంచి వస్తున్న ఫార్చునర్ కారు అదుపుతప్పి డీసీఎంను బలంగా ఢీకొట్టింది.
దీంతో కారు ముందు భాగం నుజ్జునుజ్జయింది. ఎయిర్ బ్యాగులు తెరుచుకోవడంతో కారులో ఉన్న వారికి ప్రాణపాయం తప్పింది. ఈ ఘటనలో అక్షర నాగకు తీవ్ర గాయాలు కాగా, దిశరతోపాటు ఇతర స్నేహితులకు స్వల్ప గాయాలయ్యాయి. గాయపడ్డ వారిని స్థానికులు గచ్చిబౌలిలోని ఏఐజీ ఆస్పత్రికి తరలించారు. ప్రస్తుతం వారంతా చికిత్స పొందుతున్నారని, ఎవరికీ ప్రాణాపాయం లేదని డాక్టర్లు తెలిపారు. డీసీఎం డ్రైవర్పై నార్సింగ్ పోలీసులు కేసు నమోదు చేసి దర్యాప్తు చేస్తున్నారు.
