- వాటికి సంబంధించిన నిర్ణయాల రికార్డులను అడిగిన కమిషన్
- ఆ ఫైళ్లు దొరకడం లేదని సర్కారుకు ఇరిగేషన్ శాఖ సమాచారం
- వాటిని వెతికే పనిలో పడిన అధికారులు
హైదరాబాద్, వెలుగు:మేడిగడ్డ బ్యారేజీ వైఫల్యానికి ప్రధాన కారణం.. ఆ బ్యారేజీ ఫౌండేషన్కు వాడిన ‘సీకెంట్పైల్స్(పునాదిలో స్తంభాల వంటి నిర్మాణాలు)’ అని ఇప్పటికే అధికారులు విచారణలో తేల్చిచెప్పారు. సీకెంట్పైల్స్ కటాఫ్లు, నిర్వహణ సరిగ్గా లేకపోవడంతో పైపింగ్ యాక్షన్ (ఫౌండేషన్లో సీపేజీ ఏర్పడి నీళ్లు లీకేజ్ కావడం) జరిగి బ్యారేజీ కింద భారీ గొయ్యి పడిందని అంటున్నారు. ఈ నేపథ్యంలోనే కాళేశ్వరం జ్యుడీషియల్ కమిషన్.. సీకెంట్ పైల్స్కు ఇచ్చిన అనుమతులపైనా దృష్టి సారించినట్టు తెలిసింది. ఓ వైపు కాళేశ్వరం ప్రాజెక్టు బ్యారేజీల నిర్మాణానికి సంబంధించిన కేబినెట్ అనుమతుల గురించి ఆరా తీస్తున్న కమిషన్.. ఇటు సీకెంట్పైల్స్పై అనుమతులు, వాటికి సంబంధించిన రికార్డులనూ ఇవ్వాల్సిందిగా ప్రభుత్వాన్ని కోరినట్టు తెలిసింది.
ఆ ఫైల్స్ ఇవ్వాలని ఇరిగేషన్ అధికారులను ప్రభుత్వం ఆదేశించగా.. అధికారులు వాటిని వెతికే పనిలో పడ్డారు. అయితే, సీకెంట్ పైల్స్ టెక్నాలజీపై తీసుకున్న నిర్ణయాలకు సంబంధించిన రికార్డులు కనిపించడం లేదని తెలిసింది. ఎక్కడ వెతికినా అవి దొరకడం లేదని సమాచారం. ఇప్పటికే బ్యారేజీలకు సంబంధించి కేబినెట్ తీసుకున్న నిర్ణయాల ఫైళ్లను కమిషన్కు అందించినా.. ఈ సీకెంట్పైల్స్ ఫైళ్లు మాత్రం దొరకడం లేదని ప్రభుత్వానికి అధికార వర్గాలు సమాచారమిచ్చినట్టు తెలిసింది.
2020లో ఇరిగేషన్ శాఖ పునర్వ్యవస్థీకరణలో భాగంగా చాలా మంది అధికారుల కేడర్, స్థానాలు మారాయి. అప్పుడే ఈ రికార్డులు తారుమారై ఉండొచ్చన్న అనుమానాలు వ్యక్తమవుతున్నాయి. అయితే, అంత పెద్ద ప్రాజెక్టు కడుతున్నప్పుడు ఆ రికార్డులను భద్రంగా దాచకపోవడమేంటన్న సందేహాలూ వస్తున్నాయి.
దేశంలో ఎక్కడా వాడని టెక్నాలజీ..
సీకెంట్ పైల్స్ టెక్నాలజీని కాళేశ్వరం బ్యారేజీలైన మేడిగడ్డ, అన్నారం, సుందిళ్లకు మినహా దేశంలోని ఇతర ఏ బ్యారేజీలకూ వాడలేదు. మహారాష్ట్రలోని పలు నిర్మాణాలకు సీకెంట్పైల్స్ టెక్నాలజీని వాడినా.. బ్యారేజీలు, డ్యామ్ల వంటి నిర్మాణాలకు దానిని వాడిన చరిత్ర లేదు. దేశంలోనే తొలిసారిగా ఫ్లోటింగ్ బ్యారేజీలుగా నిర్మించేందుకుగాను కాళేశ్వరం బ్యారేజీలకు వీటిని వాడారు.
బ్యారేజీలన్నింటినీ ఐఎస్(ఇండియన్ స్టాండర్డ్) కోడ్స్ప్రకారమే నిర్మించినా.. ఒక్క సీకెంట్పైల్స్కు మాత్రం బ్రిటీష్ కోడ్స్ను వాడినట్టుగా చెబుతున్నారు. బ్రిటీష్ కోడ్స్ను మన ఐఎస్ కోడ్స్కు అన్వయించుకుని.. సీకెంట్పైల్స్కు డిజైన్ చేశారని అంటున్నారు. ఈ నేపథ్యంలోనే అసలు ఈ టెక్నాలజీనే ఎందుకు ఎంచుకోవాల్సి వచ్చిందన్నదానిపై కాళేశ్వరం జ్యుడీషియల్ కమిషన్దృష్టి సారించినట్టు తెలిసింది.
అందులో భాగంగానే దానికి సంబంధించి తీసుకున్న నిర్ణయాల ఫైళ్లను ఇవ్వాల్సిందిగా కమిషన్ కోరినట్టు సమాచారం. ఆ టెక్నాలజీని వాడాలని ఆదేశించింది ఎవరు.. ఆమోదించింది ఎవరు అన్న వివరాలను ఇవ్వాల్సిందిగా ప్రభుత్వాన్ని కోరినట్టు తెలిసింది. అయితే, ఇప్పుడు కీలకమైన ఆ ఫైళ్లే దొరకడం లేదని అధికారవర్గాలు చెప్తున్నట్టుగా తెలుస్తున్నది.
కాగా, జూన్ 30 నాటికే అన్ని ఫైళ్లను కమిషన్కు ఇస్తామని సర్కారు ఇదివరకే చెప్పింది. అందులో భాగంగా బ్యారేజీల నిర్మాణం కేబినెట్ అనుమతి లేకుండానే జరిగిందని పేర్కొంటూ ఫైళ్లను సబ్మిట్ చేసింది. ఇప్పుడు మిగిలిన ఈ సీకెంట్ పైల్స్ ఫైళ్లనూ వీలైనంత త్వరగా ఇవ్వాలని ఇరిగేషన్ శాఖ వర్గాలను ఉన్నతాధికారులు ఆదేశించినట్టు తెలిసింది.
