మీరు ఇప్పుడు చెప్తున్నారు.. ముందే చెప్పాలి కదా.. ట్రాఫిక్ ఆంక్షలు అమల్లోకి వచ్చిన రోజే పోలీసుల ప్రకటన..

• వాహనదారుల అసహనం

మెహిదీపట్నం, వెలుగు: మెహిదీపట్నంలో ప్రతిష్టాత్మకంగా చేపడుతున్న స్మార్ట్ స్కైవాక్ పనులు, పీవీఎన్​ఆర్ ఎక్స్​ప్రెస్​ వేపై సీసీటీవీ కెమెరా పోల్స్ ఏర్పాటు పనుల నేపథ్యంలో మే 24, 25 తేదీల్లో (సాయంత్రం 4:00 గంటల నుంచి మరుసటి రోజు ఉదయం 6:00 గంటల వరకు) ట్రాఫిక్ ఆంక్షలు, మళ్లింపులు విధిస్తున్నట్లు హైదరాబాద్ ట్రాఫిక్ పోలీస్ జాయింట్ కమిషనర్ ఒక ప్రకటనలో తెలిపారు. అయితే, ఈ ఆంక్షలు అమల్లోకి వచ్చిన రోజే (ఆదివారం) పోలీసులు ఈ ప్రకటన విడుదల చేయడంపై వాహనదారులు అసహనం వ్యక్తం చేశారు.  సమాచారాన్ని కనీసం ఒక్క రోజు ముందే చెప్పి ఉంటే.. తాము ప్రత్యామ్నాయ మార్గాలు చూసుకునేవాళ్లమని వాపోయారు. 

మళ్లింపులు ఇలా.. 

•   మాసబ్ ట్యాంక్, ఎన్​ఎండీసీ, ఎస్.డి కంటి ఆసుపత్రి మీదుగా రేతిబౌలి వైపు వెళ్లే ట్రాఫిక్​ను పీవీఎన్ఆర్ ఎక్స్​ప్రెస్​వే పిల్లర్ నం. 2 , 3 (అజీజియా మసీదు) వద్ద మెరాజ్ కేఫ్ మీదుగా కుడి వైపునకు మళ్లిస్తున్నారు. ఈ వాహనాలు పిల్లర్ నెం. 15 వద్ద మళ్లీ సాధారణ మార్గంలోకి ప్రవేశించవచ్చు. 
•   టోలిచౌకి, లంగర్​హౌస్, అత్తాపూర్ల నుంచి మాసబ్ ట్యాంక్ వెళ్లే వాహనాలను పీవీఎన్ఆర్ ఎక్స్​ప్రెస్​వే పిల్లర్ నెం. 23 వద్ద యూ-టర్న్ చేయించి వ్యతిరేక దిశలో పంపి, ఆపై పిల్లర్ నం. 4, 5 వద్ద సాధారణ మార్గంలోకి అనుమతిస్తున్నారు.
•   మాసాబ్ ట్యాంక్ నుంచి శంషాబాద్ ఎయిర్​పోర్ట్ వైపు వెళ్లే వాహనాలను ఎస్.డి కంటి ఆసుపత్రి వద్ద లక్ష్మీనగర్ రాంప్ (పిల్లర్ నం. 77) వైపునకు, ఎయిర్​పోర్ట్ నుంచి మెహిదీపట్నం వచ్చే వాహనాలను లక్ష్మీనగర్ రాంప్ (పిల్లర్ నం. 88) వద్దకు మళ్లిస్తున్నారు. వాహనదారులు తాజా అప్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌డేట్ల కోసం హైదరాబాద్ ట్రాఫిక్ పోలీస్ అధికారిక ఫేస్​బుక్, ఎక్స్ ఖాతాలను ఫాలో అవ్వాలని, ఏదైనా అత్యవసర సహాయం కోసం ట్రాఫిక్ హెల్ప్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌లైన్ నంబర్: 9010203626 ను సంప్రదించి జాయింట్ సీపీ సూచించారు.