పాతబస్తీ అభివృద్ధిపై మంత్రి కేటీఆర్ సమీక్ష నిర్వహించారు. ఇప్పటికే హైదరాబాద్ నగర అభివృద్ధి నాలుగు దిశలా విస్తరిస్తూ.. అద్భుతమైన ప్రగతితో ముందుకు సాగుతోందని అన్నారు. ప్రాంతాలు, పార్టీలకు అతీతంగా నగరాన్ని అభివృద్ధి చేయడమే తమ లక్ష్యమని కేటీఆర్ స్పష్టం చేశారు. పాతబస్తీలో రోడ్డు నెట్వర్క్ కు సంబంధించిన పనులు వేగంగా కొనసాగుతున్నాయన్నారు. ఇప్పటికే పలు ఫ్లై ఓవర్లు, రోడ్ల నిర్మాణం పూర్తయిందని, జనావాసాలు ఎక్కువగా ఉన్న పాతబస్తీలాంటి ప్రాంతాల్లో రోడ్డు వైడనింగ్ పనులను వేగవంతం చేయాలని అధికారులను ఆదేశించారు. భూసేకరణ కోసం మరిన్ని నిధులను కేటాయించేందుకు సిద్ధమని ప్రకటించారు. ఇప్పటికే ట్రాఫిక్ జంక్షన్లతో పాటు, ఫుట్ ఓవర్ బ్రిడ్జిలు, మూసీపై వంతెనల నిర్మాణాన్ని వేగవంతం చేసినట్లు చెప్పారు. గత 8 ఏండ్లలో పాతబస్తీలో తాగునీటి సరఫరా మెరుగుపడిందని మంత్రి కేటీఆర్ అన్నారు. హైదరాబాద్తో పాటు పాతబస్తీలోను విద్యుత్ సరఫరా వ్యవస్థ మెరుగైందని చెప్పారు. చార్మినార్, చౌమహాల్లా ప్యాలెస్, మదీనా, మక్కా మసీద్, సాలార్జంగ్ మ్యూజియం తదితర పర్యాటక ప్రాంతాల్లో పారిశుధ్య నిర్వహణపైన ప్రత్యేక దృష్టి సారించినట్లు కేటీఆర్ చెప్పారు.
