ప్రాజెక్టుల పూర్తికి రూట్ మ్యాప్

• చివరి దశలో ఉన్న ప్రాజెక్టులను ముందుగా పూర్తి చేయండి
• అధికారులకు మంత్రి ఉత్తమ్ ఆదేశం
• ఏ, బీ, సీ కేటగిరీలుగా విభజించి పనులు 
• పెండింగ్ ప్రాజెక్టులన్నీ పూర్తయితే 6.5 లక్షల ఎకరాలకు నీళ్లు 
• ఇందుకోసం రూ.8 వేల కోట్లు అవసరం.. ఈసారి బడ్జెట్​లో
• రూ.11 వేల కోట్లు అదనంగా కేటాయించాలని ప్రపోజల్స్ 
• గత ప్రభుత్వం ప్రాజెక్టులపై చేసిన 
• అప్పులకే ఏటా రూ.18 వేల కోట్ల వడ్డీలు కడుతున్నామని వెల్లడి

హైదరాబాద్, వెలుగు: రాష్ట్రంలోని సాగునీటి ప్రాజెక్టులను వేగంగా పూర్తి చేసేందుకు రూట్​మ్యాప్ రూపొందించామని మంత్రి ఉత్తమ్​కుమార్ రెడ్డి తెలిపారు. ‘‘పెండింగ్ ​ప్రాజెక్టులను ఏ, బీ, సీ కేటగిరీలుగా విభజించాం. ఇప్పటికే పనులు ప్రారంభమై చివరి దశలో ఉన్న వాటిని ఏ కేటగిరీలో పెట్టాం. వీటిని సత్వరమే పూర్తి చేసి ఆయకట్టుకు నీళ్లిచ్చేలా చర్యలు తీసుకోవాలి’’ అని అధికారులను ఆదేశించారు. వచ్చే ఏడాది మార్చి లేదా డిసెంబర్ కల్లా పెండింగ్​లో ఉన్న ప్రధాన ప్రాజెక్టులన్నీ పూర్తి కావాలని చెప్పారు.

అదనపు నిధులు సమీకరించుకోవడం ద్వారా ప్రాజెక్టులను త్వరితగతిన పూర్తి చేసి, మరో 6.50 లక్షల ఎకరాలకు నీళ్లివ్వాలని ప్రభుత్వం లక్ష్యంగా పెట్టుకుందని పేర్కొన్నారు. ఇటీవల మహబూబ్​నగర్​ పర్యటనలో భాగంగా 2025 డిసెంబర్​ నాటికి ఆ జిల్లాలోని ప్రాజెక్టులను పూర్తి చేయాలని  సీఎం రేవంత్​రెడ్డి లక్ష్యం విధించారని గుర్తు చేశారు. 

ఉమ్మడి పాలమూరు జిల్లాలోని ప్రాజెక్టులతో పాటు రాష్ట్రంలో పెండింగ్​లో ఉన్న ప్రాజెక్టులపై బుధవారం హైదరాబాద్ లోని జలసౌధలో అధికారులతో ఉత్తమ్  సమీక్ష సమావేశం నిర్వహించారు. కృష్ణా బేసిన్​లోని పాలమూరు–రంగారెడ్డి, కొడంగల్–నారాయణపేట లిఫ్ట్​స్కీమ్ తో పాటు పాలమూరు జిల్లాలోని కల్వకుర్తి, భీమా, కోయిల్ సాగర్, నెట్టెంపాడు, డిండి, ఎస్ఎల్​బీసీ, రాజోలిబండ లిఫ్ట్​ఇరిగేషన్​స్కీమ్, గోదావరి బేసిన్​లోని చిన్న కాళేశ్వరం, సీతారామ, పింప్రి, సదర్మట్, నీల్వాయి, పాలెం వాగు, మత్తడి వాగు, ఎస్ఆర్ఎస్పీ ఫేజ్​2, చనాకా కొరాట, లోయర్​పెన్​గంగ, దేవాదుల, మోదికుంట వాగు ప్రాజెక్టులపై చర్చించారు.

ఈ సందర్భంగా ఉత్తమ్ మాట్లాడుతూ.. ‘‘ఏ కేటగిరీ ప్రాజెక్టులను రూ.240.66 కోట్లతో పూర్తి చేసి 47,882 ఎకరాల ఆయకట్టును సృష్టిస్తాం. ప్రస్తుతం పనులు కొనసాగుతున్న ప్రాజెక్టులకు రూ.7,500 కోట్లకు పైగా వ్యయం అవుతుంది. ఆయా ప్రాజెక్టుల ద్వారా 5,84,770 ఎకరాలకు నీళ్లందిస్తాం. ఈ నెలాఖరుకు నిర్మల్​ జిల్లాలోని సదర్మట్​ ప్రాజెక్టును సీఎం రేవంత్​రెడ్డి ప్రారంభిస్తారు. సీతారామ ప్రాజెక్టులో భాగంగా నిర్మించిన రాజీవ్​కెనాల్​ను ఆగస్టు 15న సీఎం ఓపెన్​ చేస్తారు” అని తెలిపారు. సదర్మట్ పెండింగ్ పనులను పూర్తి చేయాలని అధికారులను ఆదేశించారు. 

వడ్డీలకే రూ.18 వేల కోట్లు.. 

గత ప్రభుత్వ నిర్వాకం వల్ల ఇరిగేషన్ ప్రాజెక్టులపై చేసిన అప్పులకే రూ.18 వేల కోట్లు వడ్డీలు కడుతున్నామని ఉత్తమ్ తెలిపారు. ‘‘ఇరిగేషన్​శాఖకు కేటాయించిన రూ.28 వేల కోట్లలో ఎక్కువ మొత్తం ప్రాజెక్టుల వడ్డీలకే పోతున్నది. మరో రూ.2 వేల కోట్లు జీతభత్యాలకు ఖర్చు చేస్తున్నాం. మిగతా రూ.8 వేల కోట్లతో పెండింగ్ ప్రాజెక్టులను పూర్తి చేయడం కష్టం. ఈ నేపథ్యంలోనే పెండింగ్ ప్రాజెక్టులను పూర్తి చేసేందుకు మరో రూ.11 వేల కోట్లను బడ్జెట్​లో కేటాయించాలని ఆర్థిక శాఖకు ప్రతిపాదనలు పంపుతున్నాం” అని చెప్పారు. 

ఇచ్చంపల్లి బ్యారేజీపై అసెంబ్లీలో చర్చ.. 

ఇచ్చంపల్లి బ్యారేజీపై అసెంబ్లీలో చర్చించి నిర్ణయం తీసుకుంటామని ఉత్తమ్ తెలిపారు. ‘‘మేడిగడ్డ కుంగిపోవడం, మరమ్మతులు చేసినా గ్యారంటీ లేకపోవడంతో.. దాని స్థానంలో గోదావరి–కావేరి లింక్​ద్వారా చేపట్టాలనుకుంటున్న ఇచ్చంపల్లి బ్యాక్​వాటర్​ద్వారా 195 టీఎంసీల నీళ్లను కాళేశ్వరం ఎత్తిపోతల పథకానికి ఇస్తామంటూ నేషనల్​ వాటర్​డెవలప్​మెంట్​అథారిటీ  ప్రతిపాదించింది. దానిపై అందరితో చర్చించి నిర్ణయం తీసుకుంటాం.

తుపాకులగూడెం వద్ద నిర్మించిన సమ్మక్క సాగర్​ బ్యారేజీకి చత్తీస్​గఢ్​అభ్యంతరాలు చెప్తున్నది. ఆ రాష్ట్రంతో చర్చలు జరిపి ఒప్పిస్తాం” అని చెప్పారు. ఇరిగేషన్​శాఖలో ప్రమోషన్ల ప్రక్రియపై న్యాయనిపుణుల సలహా తీసుకుంటామని పేర్కొన్నారు. ‘‘పెండింగ్​లో ఉన్న ప్రమోషన్ల ప్రక్రియను కచ్చితంగా పూర్తి చేస్తాం. వివాదాలుంటే చర్చలతో పరిష్కరిస్తాం. గత ప్రభుత్వం ఇరిగేషన్ శాఖను పునర్వ్యవస్థీకరించి డ్యామేజ్​చేసింది. దీనిపై సమీక్షిస్తాం” అని తెలిపారు. 

మేడిగడ్డపై ఫుల్ రిపోర్ట్​ ఇవ్వండి 

కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల డ్యామేజ్​పై ఫుల్​రిపోర్ట్​ ఇవ్వాలని నేషనల్​డ్యామ్​ సేఫ్టీ అథారిటీ (ఎన్డీఎస్ఏ) చైర్మన్​ అనిల్​ జైన్​ను మంత్రి ఉత్తమ్​ కోరారు. ఎన్డీఎస్ఏ నివేదికపైనా మంత్రి సమీక్షించారు. ఈ సందర్భంగా ఎన్డీఎస్​ఏ చైర్మన్​కు ఉత్తమ్ ఫోన్ చేసి మాట్లాడారు. ఎన్డీఎస్ఏ మధ్యంతర నివేదికకు అనుగుణంగా బ్యారేజీల రక్షణకు చర్యలు తీసుకుంటున్నామని ఆయన తెలిపారు.

అన్నారం, సుందిళ్లలో జియోఫిజికల్, జియోటెక్నికల్​ ఇన్వెస్టిగేషన్స్​ జరుగుతున్నాయని.. మేడిగడ్డలో వరద మొదలవడంతో ఆపామని పేర్కొన్నారు. ఈ క్రమంలోనే ఈ నెల 20న ఢిల్లీలో ఎన్డీఎస్ఏ చైర్మన్​తో భేటీ కావాలని ఉత్తమ్​నిర్ణయించారు. పూర్తిస్థాయి నివేదికతో పాటు బ్యారేజీల పటిష్ఠతకు తీసుకోవాల్సిన చర్యలపై చర్చించనున్నారు.