విద్యార్థులకు ఉత్తమ విద్య అందిస్తాం: మంత్రి వివేక్ వెంకటస్వామి

• ఉత్తమ విద్యార్థులకు దుప్పట్లు, జ్ఞాపికల అందజేత
• చెన్నూరులో రోడ్డు విస్తరణ పనుల పరిశీలన

కోల్​బెల్ట్/చెన్నూరు/జైపూర్/కోటపల్లి, వెలుగు: రాష్ట్ర ప్రభుత్వం అన్ని ప్రభుత్వ విద్యాసంస్థల్లో సకల సౌకర్యాలు కల్పించి నాణ్యమైన విద్య అందిస్తోందని రాష్ట్ర కార్మిక, గనుల శాఖ మంత్రి వివేక్​ వెంకటస్వామి అన్నారు. సోమవారం మంచిర్యాల జిల్లా మందమర్రి, భీమారం, జైపూర్, చెన్నూరు, కోటపల్లి మండలాల్లో మంత్రి పర్యటించారు. భీమారంలోని కేజీబీవీలో జరిగిన కార్యక్రమంలో టెన్త్​లో ఉత్తమ ఫలితాలు సాధించిన విద్యార్థులకు పుస్తకాలు, దుప్పట్లు, జ్ఞాపికలను కలెక్టర్​ కుమార్​ దీపక్, డీసీపీ భాస్కర్​తో కలిసి మంత్రి అందజేశారు. 

ఇటీవల మంచిర్యాల జిల్లా కేంద్రంలోని బాయ్స్​స్కూల్​ను ఎంపీ గడ్డం వంశీకృష్ణ సందర్శించి అక్కడి విద్యార్థులకు క్రికెట్​ కిట్ ​అందిస్తానని ఇచ్చిన హామీ మేరకు మంత్రి వివేక్​ వారికి కిట్​ అందించారు. చెన్నూరు మండలం లింగంపల్లి,కోటపల్లి మండలం పారిపెల్లిలో లక్ష్మిదేవర బోనాల వేడుకల్లో పాల్గొని పూజలు చేశారు. పారిపెల్లిలో బూర్తి స్వప్న-–రాజేశ్​దంపతులు నిర్మించుకున్న ఇందిరమ్మ ఇంటిని మంత్రి ప్రారంభించారు. 

చెన్నూరు మండలం చేనేత సహకార సంఘం నూతన పాలకవర్గం బాధ్యులను సన్మానించారు. మందమర్రి, చెన్నూరు పోలీసుల ఆధ్వర్యంలో ఏర్పాటు చేసిన ఈగల్​ ఫోర్స్​టోల్​ఫ్రీ నంబర్ 1908ను ఆవిష్కరించారు. ఏసీపీ వెంకటేశ్వర్లు, సీఐలు పర్స రమేశ్, బన్సీలాల్, ఎస్సైలు పాల్గొన్నారు.

చెన్నూరులో పూర్తిస్థాయి రోడ్ల ఏర్పాటు

చెన్నూర్ మున్సిపాలిటీ పరిధిలో పూర్తిస్థాయిలో రోడ్లు నిర్మిస్తానని మంత్రి వివేక్​ తెలిపారు. పాత బస్టాండ్ నుంచి రావిచెట్టు సెంటర్ వరకు చేపట్టిన రహదారి అభివృద్ధి పనులతో పాటు రావిచెట్టు సెంటర్ నుంచి చేపట్టిన బైపాస్ రోడ్డు పనులను సోమవారం రాత్రి కలెక్టర్ కుమార్​దీపక్, మున్సిపల్ కమిషనర్​ మురళీకృష్ణ, ప్రజాప్రతినిధులతో కలిసి పరిశీలించారు. 

మున్సిపల్ చైర్​పర్సన్ పెద్దింటి పద్మ, వైస్ చైర్​పర్సన్ వినయ్​ కుమార్, మార్కెట్​ కమిటీ చైర్మన్​మహేశ్ ప్రసాద్ ​తివారీ, కమిషనర్, కౌన్సిలర్లతో సమావేశం నిర్వహించారు.