కాంగ్రెస్తోనే పంచాయతీల అభివృద్ధి: మంత్రి వివేక్ వెంకటస్వామి

• పార్టీ నేతలంతా కలిసి అభ్యర్థులను గెలిపించుకోవాలి: మంత్రి వివేక్
• చెన్నూరును రాష్ట్రానికి రోల్​మోడల్​గా తీర్చిదిద్దుతానని వ్యాఖ్య
• టికెట్ ఆశిస్తున్న నేతలతో మంత్రి సమావేశం

కోల్ బెల్ట్/చెన్నూరు, వెలుగు: రాష్ట్ర ప్రభుత్వం అమలు చేస్తున్న సంక్షేమ పథకాలపై ప్రజలు సంతోషంగా ఉన్నారని, స్థానిక సంస్థల ఎన్నికల్లో కాంగ్రెస్ పార్టీ భారీ విజయాన్ని సొంతం చేసుకుంటుందని మంత్రి వివేక్ వెంకటస్వామి దీమా వ్యక్తం చేశారు. మంచిర్యాల జిల్లా చెన్నూరు ఎమ్మెల్యే క్యాంప్ ఆఫీస్ లో శుక్రవారం కోటపల్లి మండలంలోని పంచాయతీలకు చెందిన కాంగ్రెస్ ఆశావహులతో మంత్రి వివేక్ మాట్లాడారు. కాంగ్రెస్ తోనే గ్రామపంచాయతీల అభివృద్ధి సాధ్యమన్నారు. సమిష్టి కృషితోనే కాంగ్రెస్ అభ్యర్థులను గెలిపించుకోగలుగుతామని చెప్పారు. 

చెన్నూరును రాష్ట్రంలోనే రోల్ మోడల్ గా తీర్చిదిద్దేందుకు కృషి చేస్తున్నట్లు తెలిపారు. ‘‘నియోజకవర్గంలో రూ.600 కోట్లతో అభివృద్ధి పనులు కొనసాగుతున్నాయి. గత పదేండ్లలో బీఆర్ఎస్ ప్రభుత్వం ప్రజల మౌలిక సదుపాయాలపై దృష్టి పెట్టలేదు. వారి హయాంలో రోడ్లు, డ్రైనేజీలు అస్తవ్యస్తంగా ఉండేవి’’అని వివేక్ అన్నారు. అంతకుముందు మంత్రి వివేక్ మార్నింగ్ వాక్ లో భాగంగా చెన్నూరు పట్టణంలోని వార్డుల్లో పర్యటించారు. స్థానికులతో మాట్లాడి సమస్యలు అడిగి తెలుసుకున్నారు. వెంటనే సమస్యలు పరిష్కరించాలని సంబంధిత శాఖ అధికారులను ఆదేశించారు. చెన్నూరు క్యాంపు ఆఫీసులో పనిచేసే తగరం రాజాబాబు కూతురు అంజలి పుట్టిన రోజు వేడుకలను మంత్రి వివేక్ సమక్షంలో నిర్వహించారు. అమ్మాయితో కేక్ కట్ చేయించి శుభాకాంక్షలు చెప్పారు. మంత్రి వెంట డీసీసీ ప్రెసిడెంట్ పిన్నింటి రఘునాథ్ రెడ్డి, కాంగ్రెస్ లీడర్లు ఉన్నారు.