గాంధీ ఆస్పత్రిలో ఎమ్మెల్యే పల్లా అరెస్ట్

గాంధీ ఆస్పత్రిలో ఎమ్మెల్యే పల్లా అరెస్ట్

పద్మారావునగర్, వెలుగు: నిరుద్యోగుల సమస్యలు పరిష్కరించాలని కోరుతూ ఓయూ నిరుద్యోగ జేఏసీ నేత మోతీలాల్ చేపట్టిన ఆమరణ నిరాహార దీక్ష సోమవారం(8వ రోజు) కొనసాగింది. గాంధీ హాస్పిటల్​లో దీక్ష చేస్తున్నారు. ఆయనకు మద్దతు తెలిపేందుకు సోమవారం పెద్ద సంఖ్యలో నిరుద్యోగులు, స్టూడెంట్లు వస్తున్నారని తెలిసి పోలీసులు హాస్పిటల్​బయట భారీ బందోబస్తు ఏర్పాటు చేశారు. ఈస్ట్ జోన్ డీసీపీ గిరిధర్​ఆధ్వర్యంలో ఆందోళనకు దిగిన యువతను, బీఆర్ఎస్​ నాయకులను అడ్డుకొని బొల్లారం పీఎస్​కు తరలించారు.

 మోతీలాల్​ను పరామర్శించేందుకు వచ్చిన బీఆర్ఎస్ ఎమ్మెల్యే పల్లా రాజేశ్వర్ రెడ్డి, బీసీ జనసభ రాష్ట్ర అధ్యక్షుడు, నిరుద్యోగ సమాఖ్య గౌరవ అధ్యక్షుడు డి.రాజారాం యాదవ్ ను పోలీసులు అడ్డుకున్నారు. ఈ క్రమంలో ఎమ్మెల్యే పల్లా రాజేశ్వర్​రెడ్డి, రాజారాం యాదవ్ పోలీసులతో వాగ్వివాదానికి దిగారు. పోలీసులు వారిని అరెస్ట్​చేశారు. 

ఎన్నికల ముందు హామీలు గుప్పించిన కోదండరాం, బల్మూరి వెంకట్, ఆకూనూరి మురళి, రేవంత్​ రెడ్డి, రాహుల్ గాంధీ ఎక్కడ అని ప్రశ్నించారు. కాగా మోతీలాల్​నాయక్ ‘వెలుగు’ ప్రతినిధితో మాట్లాడుతూ తాను ఎట్టిపరిస్థితుల్లో దీక్ష విరమించేంది లేదని చెప్పారు. లక్షలాది మంది నిరుద్యోగుల కోసం దీక్ష చేస్తున్నానని, హామీలను నెరవేర్చాలని కోరారు.