- ఆ బక్కమనిషి పోరాడితేనే తెలంగాణ వచ్చింది
- నోటీసులకు నిరసనగా ఈ నెల 4న మహాధర్నా
- కేసీఆర్కు ఓ కన్ను బీఆర్ఎస్.. మరో కన్ను జాగృతి
- సీఎం రేవంత్ ఇప్పటికీ జై తెలంగాణ అని అనరు
- యువ వికాసానికి రాజీవ్ పేరు ఎందుకని ప్రశ్న
- తన ఇంటి పక్కనే జాగృతి కొత్త ఆఫీసును ప్రారంభం
హైదరాబాద్, వెలుగు: కేసీఆర్ తెలంగాణ జాతిపిత అని, ఆయనకు నోటీసులు ఇవ్వడమంటే యావత్ తెలంగాణకు ఇవ్వడమేనని బీఆర్ఎస్ ఎమ్మెల్సీ, తెలంగాణ జాగృతి అధ్యక్షురాలు కవిత మండిపడ్డారు. కేసీఆర్ మీద ఈగ వాలినా ఊరుకోబోమని హెచ్చరించారు. అసలు కేసీఆర్కు నోటీసులు ఎందుకు ఇచ్చారని ప్రశ్నించారు. ‘‘తెలంగాణను కోటి ఎకరాల మాగాణిగా మార్చినందుకా? రైతుబంధు, రైతుబీమా ఇచ్చినందుకా?’’ అని నిల దీశారు.
కాళేశ్వరం ప్రాజెక్టు కట్టినప్పటి నుంచి ఏటా 20 లక్షల ఎకరాలకుపైగా సాగునీటిని కేసీఆర్ ఇవ్వడం చూసి కాంగ్రెస్ ప్రభుత్వం ఓర్వలేకపోతున్నదని, అందుకే నోటీసులు ఇచ్చిందని అన్నారు. అసలు అది కాళేశ్వరం కమిషనా? లేదంటే కాంగ్రెస్ కమిషనా? అని ప్రశ్నించారు. కేసీఆర్కు నోటీసులిచ్చినందుకు రాష్ట్రంలోని ప్రతి బిడ్డా బాధపడుతున్నారని పేర్కొన్నారు. శనివారం బంజారాహిల్స్ నందినగర్లోని తన ఇంటి పక్కనే తెలంగాణ జాగృతి కొత్త ఆఫీసును కవిత ప్రారంభించారు. ఈ సందర్భంగా మీడియాతో మాట్లాడారు. కేసీఆర్కు నోటీసులిచ్చినందుకు నిరసనగా జూన్ 4న జాగృతి ఆధ్వర్యంలో ఇందిరాపార్క్ వద్ద మహాధర్నా చేస్తామని చెప్పారు. మహాధర్నా పోస్టర్ను రిలీజ్ చేశారు.
‘‘ఆ బక్కపలచటి మనిషి (కేసీఆర్) పిడికిలెత్తి పోరాడితేనే తెలంగాణ వచ్చిం ది. ప్రత్యేక రాష్ట్రం వచ్చింది కాబట్టే ఇప్పుడు మీరు సీఎం కుర్చీలో కూర్చున్నరు. అది మరచిపోయి కేసీఆర్కే నోటీసులిస్తరా? అసలు కాళేశ్వరం కమిషన్ ఏంది.. దాని కుట్రలేంది అన్నది ఈ నెల 4న ధర్నాలో వివరిస్తాం. ప్రభుత్వం కాళేశ్వరం ప్రాజెక్టును వాడకుండా.. రైతులను ఎండబెడుతున్నారు. కాంట్రాక్టర్లకు వంతపాడుతున్నారు’’ అని కవిత వ్యాఖ్యానించారు.
ప్రజల గొంతుకగా పనిచేస్తున్నం..
తెలంగాణ జాగృతి 2006 నుంచి ప్రజల గొంతు కగా పనిచేస్తున్నదని కవిత చెప్పారు. జయశంకర్, కేసీఆర్ స్ఫూర్తితోనే జాగృతి విభాగాన్ని ఏర్పాటు చేశామని తెలిపారు. కేసీఆర్కు ఒక కన్ను బీఆర్ఎస్, మరో కన్ను జాగృతిలాగా పనిచేస్తామని అన్నారు. తెలంగాణ సాంస్కృతిక అంశాలనూ ప్రజలకు వివరించేలా జాగృతి తరఫున ఉద్యమంలో పోరాడామని గుర్తుచేశారు. కేసీఆర్ పదేండ్ల పాలనకు, ప్రస్తుత పాలనకు చాలా తేడా ఉందని కవిత చెప్పారు. సీఎం రేవంత్ రెడ్డి కనీసం ‘జై తెలంగాణ’ అనరని పేర్కొన్నారు. ఇప్పటికైనా ‘జై తెలంగాణ’ అని అనాలని, అమరులకు నివాళులర్పించాలని డిమాండ్ చేశారు.
లేదంటే సీఎం కుర్చీలో కూర్చునే హక్కు రేవంత్కు లేదన్నారు. ‘‘జూన్ 2న రాజీవ్ యువ వికాసం స్కీమ్ తెస్తామంటున్నారు. తెలంగాణ పథకాలకు రాజీవ్ పేరు ఎందుకు? తెలంగాణతో సంబంధం ఉన్నవాళ్ల పేరు పెట్టాలి. శ్రీకాంత చారి, యాదిరెడ్డి, కాళోజీ నారాయణరావు, కొండా లక్ష్మణ్ బాపూజీ, దొడ్డి కొమరయ్య వంటి వాళ్ల పేర్లు పెట్టాలి. లేదంటే మీ కాంగ్రెస్ పార్టీ నాయకుడైన పీవీ నర్సింహారావు పేరైనా పెట్టాలి’’ అని ఆమె డిమాండ్ చేశారు. పొరుగు రాష్ట్రం నీటిని తరలించుకుపోతున్నా సీఎం రేవంత్ రెడ్డి స్పందించడం లేదని విమర్శించారు.
నదుల అనుసంధానం పేరుతో ఏపీ సీఎం చంద్రబాబు బనకచర్ల రిజర్వాయర్ కడుతున్నా సీఎం రేవంత్ ఏమీ అనలేని పరిస్థితిలో ఉన్నారన్నారు. నదుల అనుసంధానంపై నాడు కేంద్రం ఒత్తిడి తెస్తే.. తుపాకులగూడెం బ్యారేజీ నుంచి నీళ్లు తీస్కపోవాలని కేసీఆర్ తేల్చి చెప్పారని గుర్తు చేశారు. కేంద్రం ఒప్పుకోకుండా ఇచ్చంపల్లి వద్ద బ్యారేజీ కడతామని చెప్పిందన్నారు. కానీ, ఇప్పుడు రివర్ లింకింగ్ పాయింట్ పోలవరానికి తీసుకెళ్లారని, పోలవరం నుంచి 200 టీఎంసీల నీటిని తరలించబోతున్నారని ఆరోపించారు. చెన్నైకి తాగునీటి తరలింపు పేరిట తెలంగాణ నుంచి గోదావరి నీళ్లను తరలించుకుపోయే కుట్రలకు తెరలేపుతున్నారని ఆరోపించారు. సీఎం దీనిపై వెంటనే మాట్లాడాలన్నారు.
బీసీ బిల్లును డీప్ ఫ్రిజ్లో పెట్టే ప్రయత్నం
బీసీ బిల్లును కేంద్రంలోని బీజేపీ సర్కారు డీప్ ఫ్రిజ్లో పెట్టే ప్రయత్నాలు చేస్తున్నదని కవిత ఆరోపించారు. అదే చేస్తే జాగృతి తరఫున తీవ్ర స్థాయిలో ఉద్యమిస్తామని, కేంద్రానికి సెగ తగిలేలా రైల్ రోకోలూ చేస్తామని హెచ్చరించారు. ప్రధాని మోదీతో భేటీలో రేవంత్ కనీసం బీసీ బిల్లు గురించి మాట్లాడలేదని అన్నారు.
రాష్ట్రం నుంచి 8 మంది బీజేపీ ఎంపీలున్నా రాష్ట్ర ప్రయోజనాలపై పోరాడడం లేదని మండిపడ్డారు. స్థానిక సంస్థల ఎన్నికలు పెట్టేలోపు జాగృతి తరఫున పోరాడి బీసీ రిజర్వేషన్లను సాధించుకుంటామని చెప్పారు. కాగా, జాగృతిలో జాగృతి విద్యార్థి విభాగం, ఎస్సీ, ఎస్టీ విభాగం, ముస్లిం, సిక్కు, క్రిస్టియన్ మైనారిటీ విభాగాలనూ ఏర్పాటు చేస్తున్నామని కవిత తెలిపారు.
