- మున్సిపాలిటీ అభ్యర్థుల ఎంపికపై.. రంగంలోకి ఎంపీ చామల
- మోత్కూరు, తిర్మలగిరి మున్సిపాలిటీల్లో కాంగ్రెస్ అభ్యర్థుల లిస్ట్ విడుదల
యాదాద్రి, వెలుగు: యాదాద్రి జిల్లా మోత్కూరు, సూర్యాపేట జిల్లా తిర్మలగిరిలో కాంగ్రెస్ అభ్యర్థుల ఎంపికపై లీడర్ల మధ్య అభిప్రాయ బేధాలు తలెత్తాయి. అభ్యర్థుల ఎంపిక విషయంలో ఎమ్మెల్యేలు, నియోజకవర్గ ఇన్చార్జీలు, డీసీసీ ప్రెసిడెంట్లు మధ్య సమన్వయం లోపించింది. అయితే మోత్కూరు మున్సిపాలిటీలో తుంగతుర్తి ఎమ్మెల్యే మందుల సామెల్ తనకు సంబంధించిన వారినే అభ్యర్థులుగా ఎంపిక చేస్తున్నారని, పార్టీ కోసం పని చేసిన వారిని పట్టించుకోలేదని ఫిర్యాదులు అందాయి.
భువనగిరి ఎంపీ చామల కిరణ్కుమార్ రెడ్డికి సంబంధించిన వారు నామినేషన్లు వేస్తే.. వారికి పోటీగా కాంగ్రెస్కు చెందిన ఇతరులతో నామినేషన్లు వేయించారని ఫిర్యాదుల్లో పేర్కొన్నారు. తిర్మలగిరి మున్సిపాలిటీలో అభ్యర్థుల ఎంపికపైనాయకుల మధ్య ఏకాభిప్రాయం కుదరలేదు.
రంగంలోకి ఎంపీ చామల
తన పార్లమెంట్పరిధిలోని మున్సిపాలిటీల్లో జరుగుతున్న ఈ పరిణామాలతో భువనగిరి ఎంపీ చామల కిరణ్కుమార్ రెడ్డి రంగంలోకి దిగారు. ఆలేరు ఎమ్మెల్యే బీర్ల అయిలయ్య, తుంగతుర్తి ఎమ్మెల్యే మందుల సామెల్, సూర్యాపేట డీసీసీ ప్రెసిడెంట్ గుడిపాటి నరసయ్య, రాష్ట్ర వ్యవసాయ సంక్షేమ కమిషన్ సభ్యులు చెవిటి వెంకన్న యాదవ్తో భువనగిరిలో సమావేశమయ్యారు. ఈ సందర్భంగా మోత్కూరు, తిర్మలగిరి మున్సిపాలిటీల అభ్యర్థుల ఎంపికపై తుంగతుర్తి ఎమ్మెల్యే మందుల సామెల్ వ్యవహరిస్తున్న తీరుపై మిగిలిన వారు తమ అసంతృప్తిని వెళ్లగక్కారు. దీంతో తాను అభ్యర్థుల ఎంపిక సరిగానే నిర్వహిస్తున్నానని ఎమ్మెల్యే మందుల సామెల్ చెప్పుకొచ్చారు.
మోత్కూరు మాజీ మున్సిపల్ చైర్మన్ కవిత భర్త లక్ష్మీ నర్సింహారెడ్డితో ఎందుకు నామినేషన్ వేయించారని ఎంపీ ప్రశ్నించినట్టు తెలిసింది. దీంతో అసహనానికి గురైన ఎమ్మెల్యే సామెల్మీటింగ్నుంచి బయటకు వెళ్లిపోయారు. కొద్దిసేపటికి మళ్లీ మీటింగ్కు వచ్చి తన ఎంపిక సరిగానే ఉందని చెప్పే ప్రయత్నం చేశారు. అసెంబ్లీ ఎన్నికల్లో మీ గెలుపు కోసం పని చేసిన వారిని విస్మరించడం సరికాదని ఎంపీ సూచనలు చేశారు. అనంతరం రెండు మున్సిపాలిటీలకు చెందిన అభ్యర్థుల లిస్టును
విడుదల చేశారు.
