హైదరాబాద్, వెలుగు: దేశ వ్యాప్తంగా పీజీ మెడికల్ ప్రాక్టికల్ పరీక్షల నిర్వహణకు ప్రభుత్వ మెడికల్ కాలేజీలు, సంస్థలు ఇకపై మొండికేయడానికి వీల్లేదని నేషనల్ మెడికల్ కమిషన్ (ఎన్ఎంసీ) స్పష్టం చేసింది. నేషనల్ బోర్డ్ ఆఫ్ ఎగ్జామినేషన్స్ (ఎన్బీఈఎంఎస్) నిర్వహించే ప్రాక్టికల్ ఎగ్జామ్స్కు సెంటర్లు కేటాయించడం లేదని, ఫ్యాకల్టీని ఎగ్జామినర్ డ్యూటీలకు పంపడం లేదని వస్తున్న ఫిర్యాదులపై ఎన్ఎంసీ సీరియస్ అయింది.
ఈ మేరకు అన్ని కాలేజీల ప్రిన్సిపాళ్లు, డీన్లకు జారీ చేసిన అడ్వైజరీలో.. పరీక్షల నిర్వహణకు అవసరమైన ఇన్ ఫ్రాస్ట్రక్చర్, వార్డులు, ల్యాబ్లు, క్లినికల్ మెటీరియల్తో పాటు పేషెంట్లను కూడా అందుబాటులో ఉంచాలని, ఎంపికైన ఫ్యాకల్టీని సకాలంలో రిలీవ్ చేయాలని ఆదేశించింది. పీజీ మెడికల్ ఎడ్యుకేషన్ ప్రమాణాలను కాపాడేందుకు ప్రభుత్వ మెడికల్ కాలేజీలు పూర్తిస్థాయిలో సమన్వయంతో వ్యవహరించాలని ఎన్ఎంసీ సెక్రటరీ డాక్టర్ రాఘవ్ లంగర్ సూచించారు.
