- హిడ్మా ఎన్కౌంటర్ నిజనిర్ధారణ కోసం వెళ్లిన ఓయూ, కేయూ విద్యార్థులు
- మారేడుమిల్లికి 40 కి.మీ దూరంలోనే అడ్డుకున్న పోలీసులు
- చింతూరు పోలీస్ స్టేషన్కు తీసుకెళ్లి 9 గంటల పాటు నిర్బంధం
హైదరాబాద్, వెలుగు: ఏపీలోని అల్లూరి సీతారామరాజు జిల్లా మారేడుమిల్లిలో జరిగిన హిడ్మా ఎన్కౌంటర్ నిజనిర్ధారణ కోసం వెళ్లిన తెలంగాణ స్టూడెంట్స్ని అక్కడి పోలీసులు 9 గంటల పాటు నిర్బంధించారు. మారేడుమిల్లికి 40 కిలోమీటర్ల దూరంలోనే వీరిని అడ్డకొని చింతూరు పోలీస్ స్టేషన్కి తీసుకెళ్లారు. శుక్రవారం ఉదయం 8 గంటల నుంచి సాయంత్రం 5 గంటల వరకు ఎటూ కదలనివ్వకుండా ఠాణాలోనే నిర్బంధించారు.
తమకేం జరిగినా సంబంధం లేదని బాండ్ పేపర్ మీద రాసిస్తే వెళ్లేందుకు అనుమతిస్తామంటూ బెదిరించారని స్టూడెంట్స్ ఆరోపించారు. స్టూడెంట్స్ను వెంటనే రిలీజ్ చేయాలని ప్రొఫెసర్ హరగోపాల్, మానవహక్కుల వేదిక నేతలు డిమాండ్ చేయడంతో సాయంత్రం 5 తర్వాత విడుదల చేశారు. నవంబర్ 18న మారేడుమిల్లిలో జరిగిన ఎన్కౌంటర్లో మావోయిస్ట్ పార్టీ సెంట్రల్ కమిటీ మెంబర్ హిడ్మాతో పాటు మరికొందరు చనిపోయారు.
ఇది ఫేక్ ఎన్కౌంటర్ అనే విమర్శలు వచ్చాయి. వైద్యం కోసం వచ్చినవారిని పట్టుకెళ్లి కాల్చి చంపారని మావోయిస్టు కేంద్ర కమిటీ కూడా ప్రకటన విడుదల చేసింది. ఈ క్రమంలో ఎన్కౌంటర్పై నిజనిర్ధారణ కోసం 12 మంది ఓయూ, కేయూ విద్యార్థులు సాయుధ, లెనిన్, విజయ్, తనూష్, కార్తీక్, శ్రవణ్, పవన్, రాజశేఖర్, క్రాంతి కిరణ్, రవిచంద్ర ఒక టీమ్గా ఏర్పడి గురువారం రాత్రి 10 గంటలకు హైదరాబాద్ నుంచి ఒక ప్రైవేట్ వెహికల్లో చింతూరు చేరుకొని రాత్రి అక్కడే బస చేశారు. శుక్రవారం ఉదయం 7 గంటలకు వీరి వెహికల్ మారేడుమిల్లి వైపు వెళ్తుండగా పోలీసులు అడ్డుకొని చింతూరు పోలీస్ స్టేషన్కి తీసుకెళ్లారు. 9 గంటల పాటు పోలీస్ స్టేషన్లోనే నిర్బంధించారు.
సాయంత్రం విడుదల చేసి తెలంగాణవైపు పంపించారు. భద్రాచలం వెళ్లేదాకా ఇద్దరు సీఐలు, ఇద్దరు ఎస్సైలు ఉన్న రెండు వెహికల్స్తో ఫాలో చేశారు. విద్యార్థులను నిర్బంధించడాన్ని ఆంధ్రప్రదేశ్ మానవహక్కుల వేదిక రాష్ట్ర అధ్యక్షుడు కేవీ జగన్నాథరావు, ప్రధాన కార్యదర్శి వై రాజేశ్ ఖండించారు. స్టూడెంట్స్ను అక్రమంగా నిర్బంధించడంపై సీపీఐ ఎమ్మెల్సీ నెల్లికంటి సత్యం ఆగ్రహం వ్యక్తం చేశారు.
