- రాజస్థాన్, చత్తీస్గఢ్లో ‘చేయి’జారిన పవర్.. మధ్యప్రదేశ్లో అధికారం నిలబెట్టుకున్న బీజేపీ
జైపూర్/భోపాల్/రాయ్పూర్ : మూడు రాష్ట్రాల అసెంబ్లీ ఎన్నికల్లో బీజేపీ విజయ దుందుభి మోగించింది. మధ్యప్రదేశ్లో అధికారాన్ని నిలబెట్టుకోవడంతో పాటు కాంగ్రెస్ అధికారంలో ఉన్న రాజస్థాన్, చత్తీస్ గఢ్ రాష్ట్రాల్లోనూ పవర్ను కైవసం చేసుకుంది. ఆదివారం వెల్లడైన ఈ మూడు రాష్ట్రాల అసెంబ్లీ ఎన్నికల ఫలితాల్లో ఈ మేరకు కమలం పార్టీ కమాల్ చేసింది. రాజస్థాన్లో ప్రభుత్వం మారుతుందని, మధ్యప్రదేశ్లో టఫ్ ఫైట్ ఉంటుందని, చత్తీస్గఢ్లో మళ్లీ కాంగ్రెస్కే అధికారం దక్కుతుందని ఎగ్జిట్ పోల్స్ అంచనా వేశాయి.
అందుకు తగ్గట్టే రాజస్థాన్లో ఓటర్లు మళ్లీ ప్రభుత్వాన్ని మార్చేసి ప్రతిపక్షంలోని బీజేపీకి అధికారాన్ని కట్టబెట్టారు. మధ్యప్రదేశ్లో ‘మామ’ శివరాజ్ సింగ్ చౌహాన్ మ్యాజిక్తో మరోసారి బీజేపీ అధికారాన్ని నిలబెట్టుకుంది. అయితే, చత్తీస్ గఢ్లో కాంగ్రెస్ తిరిగి గెలుస్తుందన్న ఎగ్జిట్ పోల్స్ అంచనాలు మాత్రం తలకిందులయ్యాయి. బీజేపీ ఇక్కడ కూడా అనూహ్యంగా కాంగ్రెస్ను ఓడించింది. సైలెంట్ విక్టరీతో అధికారాన్ని కైవసం చేసుకుని హస్తం పార్టీకి షాక్ ఇచ్చింది.
