వర్ధన్నపేట, వెలుగు: ప్రపంచాన్ని గడగడలాడిస్తున్న కరోనా మహమ్మారిపై ఓరుగల్లు పోలీసులు అలర్ట్ అయ్యారు. వరంగల్ రూరల్ జిల్లా వర్ధన్నపేట పోలీసులు సామాజిక భద్రతలో భాగంగా ఆదివారం కరోనాపై వినూత్న కార్యక్రమానికి శ్రీకారం చుట్టారు. జనాల్లో కరోనా వ్యాధిపై ఉన్న అపోహల్ని పోగొట్టేలా ఓ రథాన్ని రూపొందించారు. వెస్ట్ జోన్ డీసీపీ శ్రీనివాస్ రెడ్డి ముఖ్యఅతిథిగా హాజరై చైతన్య రథాన్ని ఆదివారం ప్రారంభించారు.
వర్ధన్నపేట పోలీస్ స్టేషన్ పరిధిలో మూడు మండలాలు, 50 విలేజ్ లు, 20 తండాలు ఉన్నాయి. చైతన్య కార్యక్రమాల్లో భాగంగా ఈ వెహికల్ ప్రతిరోజు మూడు గ్రామాల్లో తిరుగుతుంది. కరోనా వ్యాధి ప్రభావం, తీసుకోవాల్సిన జాగ్రత్తలపై ప్రచారం చేయనుంది. పనిలో పనిగా హెల్మెట్ వాడకం, డ్రంకెన్ డ్రైవ్, రోడ్ సేఫ్టీ, మహిళా భద్రత లో భాగంగా 100 డయల్ వంటి అంశాలను జనాల్లోకి తీసుకు వెళ్లనున్నారు.
