- టిక్టాక్ సిన్మా పండుగొచ్చింది
- 12 కేటగిరీల్లో నిర్వహిస్తున్న పుణే ఈవెంట్ మేనేజర్
టిక్టాక్.. యువతరాన్ని ఊపేస్తున్న వీడియో షేరింగ్ యాప్. సరదాలతో పాటు వివాదాలనూ కొని తెచ్చుకుంటున్నారు. కొందరైతే ఆఫీసుల్లోనూ టిక్టాక్ పిచ్చితో వీడియోలు చేసి ఉద్యోగాలూ పోగొట్టుకున్నారు. కాసేపు దానిని పక్కనపెడదాం. కొత్త విషయమేంటంటే, టిక్టాక్ ఫిల్మ్ ఫెస్టివల్. అవును, మీరు చదువుతున్నది నిజమే. మొట్టమొదటి టిక్టాక్ సిన్మా పండుగ. పుణేలో ఇప్పటికే మొదలయ్యాయి. ఆ టిక్టాక్ సిన్మా పండుగను ప్రకాశ్ యాదవ్ అనే ఓ ఈవెంట్ ఆర్గనైజర్ నిర్వహిస్తున్నాడు. ‘‘టిక్టాక్ ఇప్పుడు మస్తు ట్రెండ్ అవుతోంది. ఎక్కడ చూసినా టిక్టాక్ వీడియోలు హల్చల్ చేస్తున్నాయి. స్టూడెంట్లు, ఉద్యోగులు కాలేజీల్లో, ఆఫీసుల్లోనూ వీడియోలు చేస్తున్నారు. అలాంటి వాళ్ల కోసం ఏదో ఒకటి చేయాలనిపించింది. అందుకే ఈ టిక్టాక్ ఫిల్మ్ ఫెస్టివల్ను తీసుకొచ్చాం” అని ప్రకాశ్ చెప్పాడు. జులై 24న మొదలైన ఈ ఫెస్టివల్ ఆగస్టు 20 వరకు జరుగుతుంది. దేశంలోని అన్ని రాష్ట్రాలకు చెందినోళ్లూ వాళ్ల వాళ్ల వీడియోలను పంపించొచ్చు. గెలిచినోళ్లకు డబ్బుతో పాటు ట్రోఫీనిస్తారు. మొదటి ప్రైజ్ కింద ₹33,333, రెండో ప్రైజుకు ₹22,222, మూడో ప్రైజుకు ₹5,555 ఇస్తారు. 12 కేటగిరీలుగా ఈ ఫెస్టివల్ను నిర్వహిస్తున్నారు. కామెడీ, ఎమోషన్, యాక్షన్, ఉత్తమ జంట కేటగిరీలుగా పోటీ పెడుతున్నారు. అంతేకాదు, సోషల్ అవేర్నెస్ (అవగాహన), పర్యావరణం వంటి విభాగాల్లోనూ పోటీ పెట్టారు. పోటీల్లో పాల్గొని గెలవలేకపోయిన వాళ్లకూ పార్టిసిపేషన్ సర్టిఫికెట్లు ఇస్తామని ప్రకాశ్ చెప్పాడు. బాగుంది కదా ఐడియా. మరి, మీరు పంపారా మీ టిక్టాక్ వీడియోల్ని?