గోషా మహల్ ఎమ్మెల్యే రాజాసింగ్ పై మరో కేసు నమోదైంది. మార్చి30న శ్రీరామనవమి సందర్భంగా శోభాయాత్రలో రాజాసింగ్ చేసిన ప్రసంగం వివాదాస్పదంగా ఉందంటూ పోలీసులు కేసు నమోదు చేశారు. ఈ నేపథ్యంలో అప్జల్ గంజ్ పీఎస్ లో ఆయనపై కేసు నమోదైంది. పీడీయాక్ట్ కేసులో జైలుకెళ్లి ఇటీవలే విడుదలైన రాజాసింగ్.. బెయిల్ మీద విడుదలైన టైంలో తెలంగాణ హైకోర్టు.. విద్వేష పూరిత మాటలు మాట్లాడొద్దంటూ ఆయనకు షరతులతో కూడిన బెయిల్ ఇచ్చింది. తాజాగా ఆ ఆదేశాలను ఉల్లంఘించేలా రాజాసింగ్ మాట్లాడారంటూ పోలీసులు కేసు నమోదు చేశారు.
ఎమ్మెల్యే రాజా సింగ్ పై ఇటీవల ముంబయిలోనూ కేసు నమోదైంది. విద్వేషాలు రెచ్చగొట్టే విధంగా వ్యాఖ్యలు చేసినందుకు ఈ కేసు నమోదయింది. జనవరి 29న ముంబైలోని ముంబై మంఘళ్ హట్ లో జరిగిన కార్యక్రమంలో రాజాసింగ్ రెచ్చగొట్టే వ్యాఖ్యలు చేసినందుకు ఐపీసీ సెక్షన్ 153ఎ 1 (ఎ) కింద ముంబై పోలీసులు కేసు నమోదు చేశారు. ఆ సభలో మాట్లాడిన వీడియో ఆధారంగా కేసు నమోదు చేశారు. కోర్టు నిబంధనలను ఉల్లంఘించినందుకు హైదరాబాద్ పోలీసులు రాజాసింగ్ కు నోటీసులు ఇచ్చి, ఈ విషయంపై వివరణ ఇవ్వాలని కోరారు.
