హైదరాబాద్, వెలుగు: పీసీసీ చీఫ్ రేవంత్ రెడ్డి శుక్రవారం బెంగళూరు వెళ్లారు. కాంగ్రెస్ పార్టీలో చేరికల నేపథ్యంలో ఆయన ఆ రాష్ట్ర డిప్యూటీ సీఎం డీకే శివకుమార్, కాంగ్రెస్ వ్యూహకర్త సునీల్ కనుగోలుతో భేటీ కోసమే అక్కడికి వెళ్లినట్టు తెలిసింది. రెండు రోజుల కింద వైఎస్ షర్మిల ఢిల్లీలో సోనియా గాంధీ, రాహుల్ గాంధీతో భేటీ అయి తన పార్టీ వైఎస్ఆర్టీపీ విలీనంపై చర్చించారు. దాదాపు అన్నీ ఓకే అయినా.. ఆమె పోటీ చేసే స్థానంపైనే కొంచెం సందిగ్ధం ఏర్పడింది.
షర్మిల పాలేరు టికెట్కోసం పట్టుబడుతున్నారు. మరోవైపు ఏపీకి సేవలందించాలన్న అంశాన్ని ఆమె తోసిపుచ్చుతున్నారు. కాంగ్రెస్లో చేరిక, పార్టీ విలీనంపై గతంలో పలు సార్లు డీకే శివకుమార్తోనూ ఆమె భేటీ అయ్యారు. ఈ నేపథ్యంలోనే ఈ విషయంలో డీకే జోక్యం కోసం రేవంత్ బెంగళూరుకు వెళ్లినట్టు చెప్తున్నారు. కాంగ్రెస్లో షర్మిల పార్టీ విలీనం విధివిధానాలపై చర్చించినట్టు తెలిసింది.
అంతేగాకుండా.. తుమ్మల నాగేశ్వర్రావు చేరికపైనా ఆయనతోపాటు సునీల్ కనుగోలుతోనూ సమావేశమైనట్టు తెలుస్తున్నది. ఇటీవలి సర్వేల్లో పాలేరు నియోజకవర్గం పరిస్థితి ఏంటన్నది తెలుసుకున్నట్టు సమాచారం. పాలేరు టికెట్కు ఇప్పటికే పొంగులేటి శ్రీనివాస్ రెడ్డి రెడీగా ఉన్నారు. ఆయనకు తోడు తుమ్మల, షర్మిల కూడా అడుగుతున్న నేపథ్యంలో ఎవరికిస్తే బాగుంటుందన్న చర్చ జరిగినట్టు తెలిసింది.
