బషీర్బాగ్/పద్మారావునగర్, వెలుగు: కిడ్స్ టాలెంట్ కాంటెస్ట్ పేరుతో సైబర్ నేరగాళ్లు సిటీకి చెందిన ఓ మహిళను చీట్చేశారు. సికింద్రాబాద్ లో ఉండే మహిళను వండర్ కిడ్స్ ప్రతినిధులమంటూ సైబర్నేరగాళ్లు ఫేస్ బుక్ ద్వారా సంప్రదించారు. కిడ్స్ టాలెంట్ మోడల్ కాంటెస్ట్ –2025 నిర్వహిస్తున్నామని, ఇందులో పాల్గొనే చిన్నారులకు అజీయో, జారా కిడ్స్, హెచ్&ఎమ్, మదర్ కేర్ వంటి ప్రముఖ కంపెనీల యాడ్స్ లో పాల్గొనే అవకాశం కల్పిస్తామని నమ్మబలికారు. పిల్లల వివరాలు తెలుసుకున్నారు.
తరువాత టెలిగ్రామ్ ద్వారా మహిళతో కాంటాక్ట్అయ్యారు. కాంటెస్ట్లో పాల్గొంటే బట్టలు ఉచితంగా అందజేస్తామని అడ్రెస్ తీసుకున్నారు. ఆ ప్రాసెస్ పూర్తిచేయడానికి పలు టాస్క్ లు ఇచ్చారు. ఫేస్ బుక్ లోని కొన్ని పేజీలను లైక్చేసి, వాటిని స్క్రీన్ షార్ట్స్ పంపిస్తే చాలు అన్నారు. ఈజీ పనే కదా అని సదరు మహిళ ఆ టాస్క్ లను పూర్తి చేసింది. తరువాత ఆన్లైన్లో మూడు ఆర్డర్లు చేసి, డబ్బులు చెల్లించాలని, వాటిని తిరిగి పంపిస్తామని మహిళతో స్కామర్లు చెప్పారు. బాధితురాలు రూ.5వేలు, రూ.18వేలు, రూ.58వేలు ప్రొడక్ట్స్ ను బుక్ చేసి పేమెంట్చేసింది.
అయితే తర్వాత ఆర్డర్లు తప్పుగా ప్లేస్ అయ్యాయని, సిస్టమ్ క్రాష్ అయిందని చెప్పి స్కామర్లు మహిళతో రూ.98 వేలు ట్రాన్స్ఫర్చేయించుకున్నారు. తర్వాత మరో రూ.1,69వేలు పంపాలని ఒత్తిడి చేసి రూ.లక్ష ట్రాన్స్ఫర్చేయించుకున్నారు. మరోసారి టాస్క్ లు ఇచ్చి డబ్బులు చెల్లించాలని కోరడంతో ఇదంతా స్కామని తెలుసుకున్న బాధితురాలు డబ్బును తిరిగి ఇవ్వాలని కోరగా, స్కామర్లు స్పందించలేదు. తాను మొత్తం రూ. 2,79,000 పోగొట్టుకున్నట్లు సైబర్ క్రైమ్ పోలీసులకు ఆన్లైన్ ద్వారా ఫిర్యాదు చేసింది. కేసు ఫైల్చేసినట్లు హైదరాబాద్ సైబర్ క్రైమ్ ఏసీపీ శివమారుతి తెలిపారు.
అధిక లాభాలంటూ 1.60లక్షలు..
తక్కువ పెట్టుబడితో అధిక లాభాలు అంటూ ఓ మహిళను సైబర్ నేరగాళ్లు బురిడీ కొట్టించారు. రూ.1.60 లక్షలు కాజేశారు. సికింద్రాబాద్కార్కానాకు చెందిన మహిళను ఇటీవల సైబర్నేరగాళ్లు ఫోన్లో సంప్రదించారు. తక్కువ పెట్టుబడితో ఎక్కువ లాభాలు అంటూ గోల్డ్ మర్చంట్‌ ప్లాట్‌ఫాం అనే వెబ్‌సైట్‌ పేరుతో టెలీగ్రామ్ లింక్ పంపారు. దాన్ని క్లిక్చేసి, పెట్టుబడి పెట్టిన ప్రతిసారి మహిళ బ్యాంక్అకౌంట్లో డబ్బులు జమ అవుతూ వచ్చాయి. నిజమేనని నమ్మిన ఆమె రూ.1.60 లక్షలు పెట్టుబడి పెట్టింది. తర్వాత లాభాలు రాకపోగా పెట్టుబడి పైసలు పోయాయి. దీంతో బాధితురాలు కార్ఖానా పోలీసులను ఆశ్రయించింది.
