ముందే హెచ్చరికలు ఉన్నా పట్టించుకోని ప్రభుత్వం
4200 ఎకరాల ఆయకట్టు ప్రశ్నార్థకం
ఆందోళనలో రైతులు
వనపర్తి, వెలుగు: వనపర్తి జిల్లా మదనాపురం మండలంలోని సరళాసాగర్ ప్రాజెక్టుకు మంగళవారం తెల్లవారుజామున 4 గంటల ప్రాంతంలో గండి పడి, అందులోని ఒక టీఎంసీ నీరు వృథాగా పోయింది. ఎర్త్ డ్యామ్నుంచి చిన్నగా మొదలైన నీటి ప్రవాహం ఆ తర్వాత ఉధృత రూపం దాల్చి కట్టకు పెద్ద గండిపెట్టింది. ఈ నీరంతా రామన్పాడు రిజర్వాయర్లోకి వెళ్లడంతో అక్కడి ఆఫీసర్లు అలర్ట్ అయ్యారు. ప్రాజెక్టు గేట్లను ఎత్తి కృష్ణానదిలోకి వదిలేశారు. ఈ రిజర్వాయర్ కింద 4200 ఎకరాల ఆయకట్టు ఉండగా, నాట్లు వేసేందుకు నారు పోసుకున్న రైతుల ఆశలు ఆవిరయ్యాయి. కాగా, ఎలాంటి ప్రాణనష్టం జరగలేదని ఆఫీసర్లు తెలిపారు.
అరుదైన ప్రాజెక్టు
సరళాసాగర్ ఆసియా ఖండంలో మొదటి సైఫన్సిస్టం గల ప్రాజెక్టుగా గుర్తింపు పొందింది. రిజర్వాయర్లో నీరు ఫుల్ కెపాసిటీకి చేరగానే గాలిపీడనంతో గేట్లు ఆటోమేటిక్గా తెరుచుకుంటాయి. వనపర్తి సంస్థానాధీశులు తమ పేరు ప్రఖ్యాతులు ప్రపంచానికి చాటాలనే ఉద్దేశంతో ఈ తరహా సాంకేతికత జోడించారు. 1948లో నిజాం ప్రభుత్వ హయాంలో దీనిని పూర్తి చేసి జాతికి అంకితం చేశారు. వర్షాధార ప్రాజెక్టుగా ఉండడం వల్ల ఐదారేళ్లకోసారి కూడా నిండేది కాదు. 2004లో వైఎస్ రాజశేఖర్రెడ్డి హయాంలో దీనికి రూ. 13 కోట్ల వ్యయంతో ఎత్తిపోతల పథకాన్ని మంజూరు చేయడంతో నాటి నుంచి ఆయకట్టుకు సాగునీరు అందుతోంది.
నిర్వహణ గాలికి..
ఉమ్మడి ఏపీలో సరళాసాగర్ప్రాజెక్టు నిర్వహణను చాలా ఏండ్లుగా గాలికి వదిలేశారు. ప్రాజెక్టుకు కనీస మరమ్మతులు చేపట్టలేదు. తెలంగాణ ఏర్పాటుతోనైనా ఈ ప్రాజెక్టుకు మంచి రోజులు వస్తాయని రైతులు భావించినప్పటికీ టీఆర్ఎస్ ప్రభుత్వం గడిచిన ఐదేళ్లలో పైసా కూడా విదల్చలేదు. దీంతో మట్టికట్టపై చెట్లు మొలిచి బలహీనమవుతూ వచ్చింది. డ్యామ్ నిర్మించి 70 ఏళ్లు దాటడంతో గచ్చుతో నిర్మించిన గోడలు నెర్రెలు బారాయి. కొద్ది నెలలుగా లీకేజీలు బయటపడుతున్నాయి.
ప్రాజెక్టు తెగడం దురదృష్టకరం
సరళాసాగర్ప్రాజెక్టుకు గండి పడి నీరంతా బయటికి పోవడం దురదృష్టకరమని, ప్రాణ నష్టం, పంట నష్టం జరగలేదని రాష్ట్ర వ్యవసాయ, సహకార, మార్కెటింగ్ శాఖ మంత్రి సింగిరెడ్డి నిరంజన్రెడ్డి చెప్పారు. మంగళవారం ఉదయం దేవరకద్ర ఎమ్మెల్యే ఆల వెంకటేశ్వర్రెడ్డితో కలిసి గండిని పరిశీలించారు. ప్రాజెక్టు నిర్మించి చాలాకాలం కావడం వల్లే కట్ట తెగి పోయిందన్నారు. ఈ సందర్భంగా మంత్రి రైతులను ఓదార్చారు. ప్రాజెక్టు కింద సాగుకు సిద్ధమైన రైతులు నాట్లు వేసుకునేందుకు కల్వకుర్తి ఎత్తిపోతల పథకం ద్వారా నీటిని అందిస్తామని చెప్పారు. ప్రాజెక్టును తిరిగి నిర్మించేందుకు ఇంజినీర్లతో సంప్రదింపులు చేపడుతామన్నారు. ఆయన వెంట వనపర్తి జిల్లా కలెక్టర్ శ్వేతా మహంతి, ఎస్పీ అపూర్వరావు, ఎమ్మెల్యే ఆల వెంకటేశ్వర్రెడ్డి ఉన్నారు.
ప్రభుత్వం స్పందించలేదు చిన్నారెడ్డి, మాజీ మంత్రి
సరళాసాగర్ లీకవుతున్నట్లు పత్రికల్లో వార్తలు వచ్చినా ప్రభుత్వం స్పందించకపోవడం వల్లే కట్ట తెగిందని మాజీ మంత్రి, కాంగ్రెస్ సీనియర్ నేత చిన్నారెడ్డి విమర్శించారు. సరళాసాగర్ గండిని పరిశీలించిన ఆయన విలేకరులతో మాట్లాడారు. భారీ నీటి ప్రాజెక్టుల పేరిట కోట్లాది రూపాయల అవినీతికి పాల్పడుతున్న తెలంగాణ ప్రభుత్వం, చిన్న తరహా నీటి ప్రాజెక్టుల నిర్వహణను గాలికి వదిలేసిందన్నారు. డిసెంబర్ 24న కుడి, ఎడమ కాలువల ద్వారా నీటిని విడుదల చేయాల్సి ఉన్నా మదనాపురం అధికార పార్టీ జడ్పీటీసీ గోవాకు విహార యాత్రకు వెళ్లడంతో కాంగ్రెస్ మాజీ జడ్పీడీసీ బాలమణెమ్మ ప్రాజెక్టు వద్ద నిరసన తెలిపి, తూములు తెరిచారని గుర్తు చేశారు.
హెచ్చరించిన ‘వెలుగు’
సరళాసాగర్ ప్రాజెక్టుకు లీకేజీలు ఏర్పడ్డాయని, వెంటనే మరమ్మతులు చేపట్టకపోతే ముప్పు తప్పదని ‘వెలుగు’ దినపత్రిక ముందే హెచ్చరించింది. ఈ మేరకు అక్టోబర్ 23న ‘సరళాసాగర్కు లీకేజీలు.. రైతుల ఆందోళన’ పేరుతో ప్రత్యేక కథనం ప్రచురించింది. కానీ ఇరిగేషన్ ఆఫీసర్లు, ప్రజాప్రతినిధులుగానీ పట్టించుకోలేదు. దీంతో నాటి చిన్న లీకేజీలు పెద్దవై గండి పడి నీరంతా వృథాగా పోయింది. ఇటీవలే ప్రాజెక్టులో మత్స్యకారులు చేపపిల్లలు వదిలారు. రైతులు నార్లు పోసుకున్నారు. ప్రాజెక్టు ఖాళీ కావడంతో వీరంతా ఆందోళన చెందుతున్నారు.
