నర్సింహులపేట, వెలుగు : మహబూబాబాద్ జిల్లాలోని నర్సింహులపేట మండలం రామన్నగూడెంలో పింఛన్ కోసం డాబాలు ఎక్కాల్సిన పరిస్థితి ఏర్పడింది. గ్రామంలో మొత్తం 200 మందికి పింఛన్లుండగా మెషీన్కు సిగ్నల్ రాక ప్రతి రోజు ఏదో ఒక డాబా ఎక్కక తప్పడం లేదు. కొన్నేండ్లుగా వృద్ధులు, వికలాంగులు పింఛన్కోసం మెట్లపై నుంచి డాబాలు ఎక్కడానికి ఇబ్బందులు పడుతున్నారు.
వృద్ధాప్యంతో మోకాళ్ల నొప్పులు ఉన్నాయని, దీంతో బిల్డింగులపైకి ఎక్కలేకపోతున్నామని సీనియర్సిటిజర్లు ఆవేదన వ్యక్తం చేస్తున్నారు. ఇక దివ్యాంగుల పరిస్థితి చెప్పలేకుండా ఉంది. సంబంధిత ఆఫీసర్లు స్పందించి తమ గ్రామానికి సిగ్నల్ వచ్చేవిధంగా చూసి పింఛన్ కోసం డాబాలు ఎక్కే పరిస్థితిని దూరం చేయాలని కోరుతున్నారు.
