ఏసీ క్యాబిన్‌లో జాబ్, వారానికి రెండు రోజులు సెలవు, అయిదంకెల్లో జీతం.. ఇవన్నీ సాఫ్ట్‌వేర్ ఉద్యోగికి ఉండే కామన్ ఫెసిలిటీస్. వీటికి అలవాటుపడ్డ వారు వీటిని వదులుకోవడానికి అసలు ఇష్టపడరు. అయితే వీటన్నింటికి వదిలి ఓ సాఫ్ట్‌వేర్ ఇంజినీర్.. బాబాగా అవతారమెత్తాడు. విశ్వ చైతన్య అనే వ్యక్తి వృత్తిరిత్యా సాఫ్ట్‌వేర్ ఇంజినీర్. అయితే సాఫ్ట్‌వేర్ జాబ్ బోర్ కొట్టిందో లేక ఎక్కువగా సంపాదించాలనుకున్నాడో ఏమో గానీ.. జాబ్ వదిలేసి విశ్వ చైతన్య పేరుతో యూ ట్యూబ్ ఛానెల్ ఏర్పాటుచేశాడు. ఆ ఛానెల్ ద్వారా తనని తాను బాబాగా పరిచయం చేసుకున్నాడు. నల్గొండ జిల్లాలోని పీఏ పల్లి మండలం, అజ్మాపురంలో పది ఎకరాల స్థలంలో ఓ ఆశ్రమం ఏర్పాటుచేశాడు. రోగాలు నయం చేస్తానంటూ.. హోమాలు చేస్తూ.. ప్రజలను నమ్మించాడు. ఈ విధంగా కొంతకాలం నుంచి ఆశ్రమంలో అసాంఘిక కార్యక్రమాలు కొనసాగిస్తున్నాడు. రోగాల నయం, హోమాల పేరుతో భక్తుల నుంచి లక్షలు వసూలు చేసినట్లు తెలుస్తోంది. ఓ మహిళా బాధితురాలి ఫిర్యాదుతో బాబా బాగోతాలు బయటకు వచ్చాయి. దాంతో టాస్క్ ఫోర్స్ పోలీసులు బాబా విశ్వ చైతన్యను అదుపులోకి తీసుకున్నారు. ఆశ్రమం నుంచి లక్షల్లో నగదు, నగలు, కోట్ల విలువ గల ల్యాండ్ డాక్యుమెంట్స్ స్వాధీనం చేసుకున్నారు.
