- సీఎంగా రేవంత్ రెడ్డి రాష్ట్రానికి దొరికిన వరమని వెల్లడి
సైఫాబాద్, వెలుగు: తెలంగాణ సీఎంగా రేవంత్ రెడ్డి కావడం దేవుడు మనకిచ్చిన వరమని శాసనసభ స్పీకర్ గడ్డం ప్రసాద్ కుమార్ అన్నారు. బుధవారం మసాబ్ ట్యాంక్లో టీఎన్జీవో రంగారెడ్డి జిల్లా యూనియన్ కార్యాలయాన్ని టీఎంఆర్ఈఐఎస్ వైస్ చైర్మన్ ఫహీం ఖురేషీతో కలిసి ఆయన ప్రారంభించారు. ఈ సందర్భంగా స్పీకర్ మాట్లాడుతూ.. గత బీఆర్ఎస్ ప్రభుత్వం అత్త సొమ్ము అల్లుడు దానం చేసినట్లు రాష్ట్ర ఖజానాను ఖాళీ చేసిందని విమర్శించారు. సీఎం రేవంత్ రెడ్డి ప్రస్తుతం ఆర్థిక పరిస్థితిని గాడిలో పెట్టేందుకు శ్రమిస్తున్నారన్నారు.
అలాగే కొంగరకలాన్లో ఉన్న రంగారెడ్డి జిల్లా కలెక్టరేట్ను హయత్ నగర్ పరిసరాల్లోకి మార్చే ఆలోచనలో ప్రభుత్వం ఉందని, కార్యాలయం మార్పు తర్వాత అక్కడ ఉద్యోగ సంఘం భవనానికి స్థల కేటాయింపుతో పాటు నిర్మాణ బాధ్యతలను కూడా ప్రభుత్వం తరఫున చేపడతామని హామీ ఇచ్చారు. ఈ కార్యక్రమంలో టీఎన్జీవో కేంద్ర సంఘం అధ్యక్షుడు మారం జగదీశ్వర్, ప్రధాన కార్యదర్శి ముజీబ్ తదితరులు పాల్గొన్నారు.
