కాల్వలిలా.. నీరు చేరేదెలా?

• ముండ్ల పొదలతో నిండిన ఎస్సారెస్పీ–2 కాల్వలు
• ఎస్సారెస్పీ జలాల విడుదల షురూ 
• సాగుకు నీరందుతుందా లేదా అని చివరి ఆయకట్టు రైతుల దిగులు
• కాల్వల లైనింగ్​ చేపట్టాలని కోరుతున్న రైతులు

మహబూబాబాద్, వెలుగు: యాసంగిలో రాష్ట్ర ప్రభుత్వం ఎస్సారెస్పీ కెనాల్​ ద్వారా ఉమ్మడి వరంగల్లు జిల్లాలో ఎస్సారెస్పీ స్టేజీ 1, 2 ల పరిధిలో ఆన్ అండ్​ఆఫ్​ పద్ధతిలో సాగునీరు అందించాలని నిర్ణయించారు. ఎస్సారెస్పీ కాలువలు పూర్తి అధ్వాన స్థితికి చేరుకున్నాయి. ప్రధాన కెనాల్స్​మాత్రమే సిమెంట్​తో  లైనింగ్​చేశారు. మహబూబాబాద్​ జిల్లాలోని ఎస్సారెస్పీ స్టేజ్​_2 పరిధిలో డీబీఎం60 ప్రధాన కెనాల్, ఉప కాల్వలు లైనింగ్​ చేయకపోవడంతో కంప చెట్లు,  ఇతర మొక్కలు కాల్వ నిండా పెరిగాయి. తొర్రూరు మండలం పటేల్​గూడెం నుంచి దంతాలపల్లి మండలం ద్వారా మరిపెడ మండలం వరకు ఇదే ప్రధాన కాల్వగా కొనసాగుతుంది. కాల్వల లైనింగ్​ చేపట్టి ఆధునీకరించాలని ఆయకట్టు రైతులు కోరుతున్నారు.

ఎస్సారెస్పీ జలాల విడుదల..

ప్రాజెక్టుల కింద యాసంగి సీజన్​కు పూర్తిస్థాయిలో ఆయకట్టుకు సాగునీరు అందించాలని నీటిపారుదల శాఖ నిర్ణయించింది. ఈ మేరకు శ్రీరామ్​సాగర్ ఎగువ నుంచి గోదావరిలోకి నీటి ప్రవాహం వస్తుండగా, దిగువన వినియోగించిన నీరు (రీ-జనరేషన్) వచ్చి కలుస్తున్నందున యాసంగిలో పూర్తిస్థాయి ఆయకట్టుకు సాగునీరు ఇవ్వవచ్చని అధికారులు భావిస్తున్నారు. ప్రాజెక్టుల్లో నీటిలభ్యతకు అనుగుణంగా ఉమ్మడి వరంగల్ లో సుమారుగా 5.77 లక్షల ఎకరాలకు ఆన్ అండ్ ఆఫ్ పద్ధతిన యాసంగి సాగునీరు సరఫరా కానుందని అంచనా వేశారు. 

2026 జనవరి 3నుంచి మార్చి 31 వరకు వారం రోజులు నీటి విడుదల చేస్తే, మరోవారం రోజులు నీటి సరఫరా నిలిపివేస్తారు. ఇరిగేషన్ అధికారుల ప్రతిపాదనల ప్రకారం ఎస్సారెస్పీ స్టేజ్_1 (ఎల్ఎండీ) కింద 2,21,947 ఎకరాలు, కాలేశ్వరం ప్రాజెక్టు పరిధిలో 93,070 ఎకరాల ఆయకట్టు ఉంది. ఎస్సారెస్పీ–2 కింద 90,611 ఎకరాలు, దేవాదుల ఎత్తిపోతల పథకంద్వారా 1,71,528 ఎకరాల ఆయకట్టుకు యాసంగిలో సాగునీరు సరఫరా చేయవచ్చని అధికారులు భావిస్తున్నారు.

నీటిని పొదుపుగా వినియోగించుకోవాలి..

యాసంగిలో రైతులకు సాగునీరు అందించడానికి ప్రభుత్వం ఎస్సారెస్పీ జలాలను జనవరి 1 నుంచి విడుదల చేసింది. నీటిని పొదుపుగా వాడుకోవాలి. ఎస్సారెస్పీ కాల్వల్లో అడ్డుకట్ట వేయడం, అక్రమంగా మోటర్లను బిగించడం, కింది ఆయకట్టుకు సాగునీరు వెళ్లకుండా అడ్డుకోకూడదు. కాల్వలు దెబ్బతిన్న చోట ఆధునీకరణకు ప్రభుత్వానికి ప్రతిపాదనలను పంపించాం. - రామకృష్ణ, ఇరిగేషన్, ఎస్ఈ, మహబూబాబాద్​