రౌడీ హీరో విజయ్ దేవరకొండ, నేషనల్ క్రష్ రష్మిక మందన్న జంటగా తెరకెక్కుతున్న పీరియాడికల్ యాక్షన్ డ్రామా ‘రణబాలి’పై ఇప్పటికే భారీ అంచనాలు నెలకొన్నాయి. ‘ట్యాక్సీవాలా’ తర్వాత విజయ్ దేవరకొండ, దర్శకుడు రాహుల్ సాంకృత్యన్ కాంబినేషన్లో వస్తున్న సినిమా కావడం ఒక కారణమైతే.. ‘గీత గోవిందం’, ‘డియర్ కామ్రేడ్’ తర్వాత విజయ్-రష్మిక మరోసారి కలిసి నటించడం కూడా ఈ సినిమాపై ఆసక్తిని మరింత పెంచుతోంది.
ఇప్పటికే విడుదలైన టీజర్ సినిమాకు సంబంధించిన కథా ప్రపంచాన్ని ప్రేక్షకులకు పరిచయం చేసింది. 19వ శతాబ్దం నాటి దక్షిణ భారతదేశం, బ్రిటిష్ పాలన, కరువు, ప్రజల ఆకలి, అణచివేత, తిరుగుబాటు వంటి అంశాల చుట్టూ ఈ కథ సాగనున్నట్లు టీజర్ ద్వారా స్పష్టమైంది. ముఖ్యంగా 1876-78 మధ్య జరిగిన మహా కరువు నేపథ్యంలో ఈ సినిమా కథను నిర్మించినట్లు సమాచారం.
‘ఏందయ్యా సామి’తో మరింత హైప్..
ఇక సినిమాకు సంబంధించిన ప్రమోషన్లో ఇప్పటికే విడుదలైన టీజర్కు మంచి స్పందన వచ్చింది. విజయ్ దేవరకొండను మునుపెన్నడూ చూడని రా అండ్ రగ్గడ్ లుక్లో చూపించడం, బ్రిటిష్ అధికారులతో పోరాటాలు, భారీ యాక్షన్ సన్నివేశాలు, రష్మిక పాత్ర ఇలా టీజర్లో చూపించిన అంశాలు సినిమాపై ఆసక్తిని పెంచాయి. దీనికి తోడు ‘ఏందయ్యా సామి’ పాట కూడా సినిమాపై అంచనాలను పెంచుతోంది. దీంతో సినిమా కథ ఎలా ఉండబోతోంది? రణబాలి అనే పాత్రకు అసలు నేపథ్యం ఏంటి? జయమ్మ పాత్ర కథలో ఎంత కీలకంగా ఉంటుంది? అనే ఆసక్తి ప్రేక్షకుల్లో నెలకొంది.
మైత్రి మేకర్స్ సంచలన ప్లాన్!
ఈ ఆసక్తిని మరింత పెంచేలా తాజాగా మైత్రి మూవీ మేకర్స్ కొత్త ప్రమోషనల్ ప్లాన్ను ప్రకటించింది. సినిమాకు సంబంధించిన నాలుగు భాగాల ప్రత్యేక ‘Truth Series’ను ప్రేక్షకుల ముందుకు తీసుకురానున్నారు.
మేకర్స్ విడుదల చేసిన ప్రకటన ప్రకారం..
Truth 1 – The Famine We Forgot:
‘మనం మర్చిపోయిన కరువు’ అనే కాన్సెప్ట్తో మొదటి ఎపిసోడ్ను తీసుకురానున్నారు. కరువు వెనుక ఉన్న పరిస్థితులు, దాని ప్రభావం వంటి అంశాలపై ఇందులో ఫోకస్ చేయనున్నారు.
Truth 2 – The History We Forgot:
‘మనం మర్చిపోయిన చరిత్ర’ పేరుతో రెండో ఎపిసోడ్ సెప్టెంబర్ 30 నుంచి అందుబాటులోకి రానుంది. ముఖ్యంగా రైల్వే వ్యవస్థ ఎందుకు నిర్మించబడింది? దాని వెనుక ఉన్న చారిత్రక నేపథ్యం ఏంటి? కాలక్రమంలో చరిత్రను ఎలా గుర్తుపెట్టుకున్నాం? వంటి అంశాలను ఇందులో ప్రస్తావించనున్నట్లు మేకర్స్ తెలిపారు.
On
— Mythri Movie Makers (@MythriOfficial) September 27, 2026
28.09.26
30.09.26
02.10.26
**.**.**
We are coming to correct our altered history 🔥#Ranabaali #NeverForget #RanabaaliOnOct16th pic.twitter.com/dQV4RQFMFb
Truth 3 – The Men We Forgot:
మూడో ఎపిసోడ్ అక్టోబర్ 2 నుంచి రానుంది. బ్రిటిష్ పాలనకు తలవంచని, వారికి ఎదురొడ్డి నిలిచిన కానీ చరిత్రలో పెద్దగా ప్రస్తావనకు రాని వ్యక్తుల గురించి ఈ ఎపిసోడ్లో చెప్పనున్నట్లు వెల్లడించారు.
Truth 4 – The Last Load:
నాలుగో ఎపిసోడ్ వివరాలను త్వరలో వెల్లడించనున్నట్లు మైత్రి మూవీ మేకర్స్ ప్రకటించింది.
ఈ నాలుగు భాగాల సిరీస్ ద్వారా ‘రణబాలి’ కథకు స్ఫూర్తిగా నిలిచిన చారిత్రక నేపథ్యాన్ని ప్రేక్షకులకు పరిచయం చేయడమే కాకుండా.. సినిమా ప్రపంచాన్ని అర్థం చేసుకునేలా మరింత కంటెంట్ను అందించనున్నట్లు తెలుస్తోంది.
రణబాలి కథ ఏంటి?
‘రణబాలి’లో విజయ్ దేవరకొండ టైటిల్ పాత్రలో కనిపించనున్నారు. బ్రిటిష్ పాలనలో కరువు, ఆకలి, దోపిడీతో అల్లాడుతున్న ప్రజల కోసం పోరాడే ఓ వీరుడిగా ఆయన పాత్రను చూపిస్తున్నారు. మరోవైపు రష్మిక మందన్న జయమ్మ పాత్రలో నటిస్తోంది. టీజర్ ప్రకారం ఆమె రణబాలి భార్యగా, అతడి పోరాటంలో భాగస్వామిగా కనిపించనుంది.
కథలో కీలకమైన ప్రతినాయక పాత్రను హాలీవుడ్ నటుడు ఆర్నాల్డ్ వోస్లూ పోషిస్తున్నారు. ఆయన సర్ థియోడర్ హెక్టర్ అనే బ్రిటిష్ అధికారి పాత్రలో కనిపించనున్నారు. కరువు పరిస్థితుల్లో ధాన్యాన్ని నియంత్రిస్తూ ప్రజలను తీవ్ర ఇబ్బందులకు గురిచేసే అధికారిగా ఈ పాత్రను టీజర్లో చూపించారు. దీనికి వ్యతిరేకంగా రణబాలి తిరుగుబాటు చేస్తాడు.
అయితే ‘రణబాలి’ని పూర్తిగా చారిత్రక బయోపిక్గా చూడాల్సిన అవసరం లేదు. మేకర్స్ గతంలో వెల్లడించిన వివరాల ప్రకారం, ఇది వాస్తవ చారిత్రక ఘటనలు, జానపద కథనాలు, అప్పటి పరిస్థితుల నుంచి స్ఫూర్తి పొంది రూపొందించిన సినిమాటిక్ రీకన్స్ట్రక్షన్. అంటే చరిత్రలోని ఒకే వ్యక్తి జీవితకథను తెరపై చూపించే సినిమా కాదని తెలుస్తోంది.
కరువు.. తిరుగుబాటు.. రణబాలి
1876-78 మధ్య జరిగిన గ్రేట్ మద్రాస్ ఫ్యామిన్ దక్షిణ భారతదేశంలోని పలు ప్రాంతాలను తీవ్రంగా ప్రభావితం చేసింది. ముఖ్యంగా అప్పటి మద్రాస్ ప్రెసిడెన్సీలో భాగంగా ఉన్న రాయలసీమ ప్రాంతం కూడా తీవ్ర కరువు, ఆకలి పరిస్థితులను ఎదుర్కొంది. ఈ చారిత్రక నేపథ్యాన్నే ‘రణబాలి’ కథకు ప్రధాన ఆధారంగా తీసుకున్నట్లు టీజర్, మేకర్స్ ప్రమోషన్ ద్వారా అర్థమవుతోంది.
ప్రజలు ఆకలితో అలమటిస్తున్న సమయంలో బ్రిటిష్ పాలనా విధానాలు, ధాన్యం నిల్వలు, పన్నుల భారం వంటి అంశాలు పరిస్థితిని మరింత విషమంగా మార్చినట్లు చారిత్రక కథనాలు చెబుతున్నాయి. ఈ నేపథ్యంలో ప్రజల్లో పుట్టిన ఆగ్రహం, ప్రతిఘటన, తిరుగుబాటును రణబాలి పాత్ర ద్వారా దర్శకుడు రాహుల్ సాంకృత్యన్ తెరపై చూపించనున్నట్లు తెలుస్తోంది.
విజయ్-రష్మిక మరోసారి..
విజయ్ దేవరకొండ, రష్మిక మందన్న కలిసి నటిస్తున్న మూడో సినిమా కావడంతో ‘రణబాలి’పై క్రేజ్ మరింత పెరిగింది. ‘గీత గోవిందం’, ‘డియర్ కామ్రేడ్’ తర్వాత ఈ జంట మరోసారి కలిసి నటిస్తోంది. అయితే ఈసారి లవ్స్టోరీ కాకుండా పూర్తిగా భిన్నమైన పీరియాడికల్ యాక్షన్ డ్రామాలో వీరిద్దరూ కనిపించనున్నారు. దర్శకుడు రాహుల్ సాంకృత్యన్ ఈ కథను భారీ స్థాయిలో తెరకెక్కించారు. మైత్రి మూవీ మేకర్స్ బ్యానర్పై నవీన్ యెర్నేని, వై. రవిశంకర్ నిర్మిస్తున్న ఈ చిత్రాన్ని టీ-సిరీస్ సమర్పిస్తోంది. అజయ్-అతుల్ సంగీతం అందిస్తున్నారు.
అక్టోబర్ 16న థియేటర్లలోకి..
ఇప్పటికే షూటింగ్ పూర్తయిన ‘రణబాలి’ ప్రస్తుతం విడుదలకు సిద్ధమవుతోంది. ఈ పాన్ ఇండియా చిత్రాన్ని అక్టోబర్ 16, 2026న ప్రపంచవ్యాప్తంగా థియేటర్లలో విడుదల చేయనున్నట్లు తాజా సమాచారం.
అయితే సినిమా విడుదలకు ముందు ఈ నాలుగు ‘Truth’ ఎపిసోడ్ల ద్వారా మేకర్స్ ఏం చెప్పబోతున్నారు? ముఖ్యంగా ‘The Famine We Forgot’, ‘The History We Forgot’, ‘The Men We Forgot’లో బయటకు రానున్న విషయాలు సినిమాలోని కథను ఎంతవరకు అర్థం చేసుకునేలా చేస్తాయి? అనేది ఆసక్తికరంగా మారింది. ‘రణబాలి’ కథకు సంబంధించిన మరిన్ని వివరాలు ఈ సిరీస్తో బయటకు వచ్చే అవకాశం ఉంది.
