గత మూడు నెలలుగా ఉద్యోగులు, ఉపాధ్యాయుల వేతనాలు, విశ్రాంత ఉద్యోగుల పెన్షన్లలో కోతపెడుతున్న ప్రభుత్వం తన చర్యను సమర్ధించుకోవటానికి రాత్రికి రాత్రే ఆర్డినెన్సును తీసుకు రావటాన్ని ఉద్యోగులు, ఉపాధ్యాయులు, పెన్షనర్లు, పబ్లిక్ సెక్టార్& కాంట్రాక్టు ఉద్యోగుల ఐక్యవేదిక తీవ్రంగా ఖండిస్తున్నది. చీకటి చట్టాన్ని తక్షణమే ఉపసంహరించుకొని, జూన్ నెల నుండి పూర్తి వేతనాలు, పెన్షన్లు చెల్లించాలని డిమాండ్ చేస్తున్నది.
లాక్డౌన్ ప్రభావంతో రాష్ట్ర ఆదాయం తీవ్రంగా పడిపోయిందని చెబుతూ కేసీఆర్ సర్కార్ ఉద్యోగులు, పెన్షనర్లు, ప్రజాప్రతినిధులకు చెల్లించే వేతనాల్లో కోత విధించింది. అయితే పెన్షన్ లో కోత విధించడాన్ని సవాల్ చేస్తూ పెన్షనర్లు హైకోర్టును ఆశ్రయించారు. పెన్షన్లలో కోత విధించే అధికారం తమకు ఉందని హైకోర్టులో ప్రభుత్వం వాదించగా.. ఏ హక్కు ఉందో చెప్పాలని న్యాయస్థానం సర్కారును ఆదేశించింది. ఈ నేపథ్యంలో ఉద్యోగులు, పెన్షనర్ల చెల్లింపుల విషయమై డిజాస్టర్ మేనేజ్మెంట్ చట్ట సవరణ చేస్తూ తెలంగాణ సర్కారు జూన్ 16న రాత్రికి రాత్రే ఆర్డినెన్స్ను తీసుకొచ్చింది. దీంతో పెన్షనర్లు మండిపడుతున్నారు.
రాష్ట్రంలో ఏవైనా విపత్తులు లేదా ప్రజారోగ్యానికి సంబంధించి అత్యవసర పరిస్థితి తలెత్తినప్పుడు ఏ వ్యక్తికైనా, సంస్థకైనా, పెన్షనర్లకైనా చెల్లింపులను వాయిదా వేసే అధికారం ప్రభుత్వానికి కల్పించేలా ఈ ఆర్డినెన్స్ను రూపొందించారు.మార్చి 24 నుండి ఈ ఆర్డినెన్స్ అమలులోకి వచ్చినట్లు గెజిట్ లో ప్రచురించారు. చివరకు కనీస వేతనాలు, సెలవులు వంటి ఏ చట్టాలూ వర్తించని కాంట్రాక్టు, ఔట్ సోర్సింగ్ ఉద్యోగులను కూడా ఈ ఆర్డినెన్స్ లో చేర్చింది.
కాగా ఉద్యోగులు, పెన్షనర్ల వేతనాలు, పెన్షన్లలో కోతలపై కోర్టులో సమాధానం చెప్పుకోలేక రాత్రికి రాత్రే ప్రభుత్వం ఆర్డినెన్స్ తీసుకురావటాన్ని ఐక్యవేదిక తీవ్రంగా ఖండించింది. ఉద్యోగుల స్నేహపూర్వక ప్రభుత్వం అని చెప్పుకునే రాష్ట్ర ప్రభుత్వ అప్రజాస్వామిక విధానాన్ని తీవ్రంగా ఖండిస్తున్నామని తెలిపింది. ఇప్పటికే మూడు నెలలుగా వేతనాల్లో కోత వల్ల ఉద్యోగులు, పెన్షనర్లు తీవ్రంగా ఇబ్బంది పడుతున్నారని.. కోతను ఇంకా కొనసాగించే ఉద్దేశంతోనే ఆర్డినెన్స్ను తీసుకొచ్చారని ఐక్యవేదిక విమర్శించింది.
ఉద్యోగులు, ఉపాధ్యాయులు, పెన్షనర్ల ప్రయోజనాలను దెబ్బతీసే ఆర్డినెన్స్ వెంటనే రద్దు రద్దు చేసి మూడు నెలల వేతన బకాయిలు విడుదల చేయాలని ,జూన్ నెల నుంచి పూర్తి వేతనం చెల్లించాలని ఐక్యవేదిక స్టీరింగ్ కమిటీ డిమాండ్ చేసింది.
