- కేంద్ర హోంశాఖకు తెలిపిన రాష్ట్ర పోలీసు ఉన్నతాధికారులు
హైదరాబాద్, వెలుగు: పాకిస్తాన్ తో నెలకొన్న ఉద్రిక్త పరిస్థితుల నేపథ్యంలో వివిధ రాష్ట్రాల పోలీస్ ఉన్నతాధికారులతో కేంద్ర హోంశాఖ గురువారం వీడియో కాన్ఫరెన్స్ నిర్వహించింది. ఇందులో రాష్ట్రం నుంచి ఇంటెలిజెన్స్ డీజీ శివధర్రెడ్డి, సీఐడీ చీఫ్ శిఖాగోయల్, శాంతిభద్రతల అడిషనల్ డీజీ మహేశ్ భగవత్ పాల్గొన్నారు. తెలంగాణలో తాము పూర్తిస్థాయిలో అప్రమత్తంగా ఉన్నామని, ప్రస్తుతం రాష్ట్రంలో ప్రశాంత వాతావరణం ఉందని స్పష్టం చేశారు. మిస్ వరల్డ్ పోటీల కోసం రాష్ట్రానికి వచ్చిన కంటెస్టెంట్లు, విదేశీ మీడియా, అతిథులకు బందోబస్తు కల్పిస్తున్నామని చెప్పారు.
వారు బస చేసే హోటళ్ల వద్ద భద్రతా ఏర్పాట్లు చేశామని వివరించారు. మిస్ వరల్డ్ పోటీలు నిర్వహించే వేదికలను, కంటెస్టెంట్లు పర్యటించే ప్రాంతాలను తమ నియంత్రణలోకి తెచ్చుకున్నామన్నారు. ‘ఆపరేషన్ అభ్యాస్’ పేరుతో బుధవారం నిర్వహించిన మాక్డ్రిల్స్ గురించి కూడా కేంద్ర ప్రభుత్వానికి వివరించారు. కాగా.. ఎలాంటి అవాంఛనీయ ఘటనలకు తావులేకుండా అప్రమత్తంగా ఉండాలని కేంద్రహోంశాఖ ఉన్నతాధికారులు సూచించినట్టు తెలిసింది.
