హైదరాబాద్, వెలుగు: బిజినెస్ ఇంక్యుబేటర్ టీ–హబ్2.0 ను ఈ నెల 28 న లాంఛ్ చేయనున్నట్లు ప్రభుత్వం ఒక ప్రకటనలో తెలిపింది. ఈ కొత్త బిల్డింగ్లో మొత్తం 5.82 లక్షల చదరపు అడుగుల స్థలం అందుబాటులో ఉంటుందని, ప్రపంచంలోనే పెద్ద ఇన్నొవేషన్ క్యాంపస్ అవుతుందని పేర్కొంది. ఫ్రాన్స్లోని స్టేషన్ ఎఫ్ తర్వాత రెండో పెద్ద స్టార్టప్ ఇంక్యుబేటర్గానూ నిలుస్తుందని తెలిపింది. స్టార్టప్కంపెనీలను ప్రోత్సహించడానికి 2015లో మొదటిసారిగా టీ–హబ్ను హైదరాబాద్లో ఏర్పాటు చేశారు. ఇప్పుడు ఇన్నొవేషన్ ఎకోసిస్టమ్ను ఏర్పాటు చేసేందుకు 2 వేల స్టార్టప్ కంపెనీల ఏర్పాటుకు వీలు కల్పించేలా టీ–హబ్2.0 తెస్తున్నట్లు ప్రభుత్వం ఈ ప్రకటనలో వివరించింది. స్టార్టప్లు, కార్పొరేట్లు, ఇన్వెస్టర్లు, అకాడమియా...అందరినీ టీ–హబ్2.0 ఒక చోటికి చేరుస్తుందని టీ–హబ్ సీఈఓ మహంకాళి శ్రీనివాస రావు చెప్పారు. గత ఆరేళ్లలో టీ–హబ్ ఇంక్యుబేటర్ లెవెల్ నుంచి ఇన్నొవేటర్ లెవెల్కు ఎదిగిందని పేర్కొన్నారు. తన ప్రోగ్రామ్స్తో 1,800 స్టార్టప్లకు టీ–హబ్ చేరువైందని తెలిపారు.
