కృష్ణా జలాల సాధన కోసం జనవరి 10న నిరసన దీక్ష చేస్తామని టీజేఎస్ అధ్యక్షుడు కోదండరాం వెల్లడించారు. ఈ నెల 20న ‘ధరణి’ పోర్టల్ సమస్యలపై సదస్సు నిర్వహిస్తామని తెలిపారు. దేశవ్యాప్తంగా కేసీఆర్ అవినీతిని ఎండగడుతామని చెప్పారు. కేసీఆర్కు రాజకీయ ప్రయోజనాలు తప్పితే ప్రజల బాధలు పట్టవని కోదండరాం అన్నారు. రాష్ట్రంలో ప్రజా సమస్యలపై ఆందోళనలు చేస్తే అరెస్టులు చేయించే కేసీఆర్.. ఢిల్లీకి వెళ్లి ప్రజాస్వామ్యం గురించి మాట్లాడటం ఆశ్చర్యంగా ఉందన్నారు. జనవరి 30న ఢిల్లీలో సెమినార్, 31న విభజన హామీల అమలును కోరుతూ ఆందోళన చేస్తామని కోదండరాం ప్రకటించారు. విభజన హామీల అమలును కోరుతూ కేంద్ర ప్రభుత్వానికి లేఖ రాస్తామని పేర్కొన్నారు.
టీఆర్ఎస్, బీఆర్ఎస్ గా మారిపోయి ఎటుపోవాలో అర్థంకాక కొట్టుమిట్టాడుతోందని చెప్పారు. 119 అసెంబ్లీ స్థానాలే తమ లక్ష్యమని కోదండరాం స్పష్టం చేశారు. గత తొమ్మిదేళ్లలో టీఆర్ఎస్ ప్రభుత్వం అడ్డగోలుగా దోచుకుందని.. నీళ్లు, నిధులు, నియామకాల ఆకాంక్ష ఇంకా నెరవేరలేదని తెలిపారు. లిక్కర్ వ్యాపారంతో కేసీఆర్ కూతురు కవితకు ఏం పని అని ఆయన ప్రశ్నించారు. గ్రామ పంచాయతీల నిధులను సైతం కేసీఆర్ సర్కారు కొల్లగొట్టిందని ఆరోపించారు. ‘‘సెంటు చుక్క వాసన వచ్చే వాడు కాదు.. చెమట చుక్క కార్చేవారే మా అభ్యర్థి”అని కోదండరాం తేల్చి చెప్పారు. ‘‘తెలంగాణ ఉద్యమకారులమంతా ఈ రోజు సమావేశం అయ్యాం. అందరం ఏకమై తెలంగాణవాదాన్ని రక్షించుకోవాలని నిర్ణయించుకున్నాం. త్యాగాల పునాదిపై ఏర్పడిన పార్టీలోని తెలంగాణ అనే పదాన్ని బీఆర్ఎస్ తొలగించింది. తద్వారా ఉద్యమ అమరులను, తెలంగాణ వాదాన్ని అవహేళన చేసింది”అని ఆయన మండిపడ్డారు.
