వాషింగ్టన్: అమెరికా, ఇరాన్ ఉద్రిక్తతల వేళ అమెరికా అధ్యక్షుడు ట్రంప్ మరో బిగ్ బాంబ్ పేల్చాడు. ప్రపంచ చమరు రవాణాకు అత్యంత కీలకమైన హార్మూజ్ జలసంధిని మళ్లీ దిగ్భంధిస్తున్నట్లు ప్రకటించాడు. ఇకపై హార్మూజ్ జలసంధిని పూర్తిగా అమెరికా నియంత్రిస్తుందని తెలిపారు. ఇరాన్ నుంచి హార్మూజ్ జలసంధిని రక్షించి.. అంతర్జాతీయ నౌకయాన వాణిజ్యానికి ఎలాంటి ఆటంకం లేకుండా చూసుకుంటామని పేర్కొన్నారు.
హార్మూజ్ను రక్షిస్తునందుకు గానూ ఈ జలసంధి గుండా వాణిజ్య కార్యకలాపాలు కొనసాగించే దేశాలు అమెరికాకు 20 శాతం సుంకాలు చెల్లించాలని ప్రపంచదేశాలకు పిడుగులాంటి వార్త చెప్పాడు. ఈ మేరకు తన సొంత సోషల్ మీడియా ప్లాట్ఫామ్ ట్రూత్ వేదికగా ట్రంప్ ఈ ప్రకటన చేశాడు.
‘‘ఇరాన్ ఉన్నా లేకపోయినా హోర్ముజ్ జలసంధి తెరిచే ఉంది.. తెరిచే ఉంటుంది. ఇరాన్ దిగ్బంధనాన్ని పునరుద్ధరిస్తున్నాము. ఈ దిగ్బంధనం కేవలం ఇరాన్ నౌకలు, వారి వినియోగదారులకు మాత్రమే. మిగతా అన్ని దేశాలు ఈ జలసంధిని న్యాయబద్ధంగా, స్వేచ్ఛగా ఉపయోగించుకోవచ్చు.
ఈ క్షణం నుంచి అమెరికా హోర్ముజ్ జలసంధి సంరక్షకుడుగా మారుతోంది. అయితే ఈ అస్థిరమైన ప్రాంతానికి భద్రత, రక్షణ కల్పించినందుకు గానూ హార్మూజ్ గుండా వాణిజ్య కార్యకలాపాలు కొనసాగించే దేశాలు అమెరికాకు 20 శాతం సుంకాలు చెల్లించాలి. ఈ ప్రక్రియ తక్షణమే ప్రారంభమవుతుంది’’ అని ట్రూత్లో ట్రంప్ పేర్కొన్నారు.
►ALSO READ | హార్మూజ్ను అమెరికా కంట్రోల్ చేస్తది.. ఇకపై మాకే పన్నులు కట్టాలి: ట్రంప్ సంచలన ప్రకటన
ట్రంప్ ప్రకటనతో ప్రపంచ దేశాల్లో కొత్త ఆందోళన మొదలైంది. అమెరికా, ఇరాన్ యుద్ధం వల్ల ఇంధన సంక్షోభం ఏర్పడి ఇప్పటికే పలు దేశాల ఆర్థిక వ్యవస్థలు అతలాకుతలం అవుతున్నాయి. ఈ క్రమంలో చమురు రవాణాకు అత్యంత కీలకమైన హార్మూజ్ గుండా సాగించే రాకపోకలకు 20 శాతం సుంకాలు కట్టాలని ట్రంప్ ఆదేశించడం ప్రపంచ దేశాల ఆర్థిక వ్యవస్థలకు గుదిబండగా మారనుంది.
హార్మూజ్ జలసంధి గుండా వెళ్లే వాణిజ్య నౌకలు ట్యాక్స్ చెల్లించాలన్న ఇరాన్ ఆదేశాలపై భారత్ వంటి దేశాలు ఇప్పటికే ఆగ్రహం వ్యక్తం చేశాయి. అంతర్జాతీయ జలాల గుండా ప్రయాణించే నౌకలపై సుంకాలు వసూల్ చేసే అధికారం ఏ దేశానికి లేదని తేల్చి చెబుతున్నాయి. మరీ ట్రంప్ తాజా ప్రకటనపై ప్రపంచ దేశాలు ఏ విధంగా రియాక్ట్ అవుతాయో చూడాలీ.
