- నార్త్ జోన్ డీసీపీ కార్యాలయానికి తరలించి విచారణ
- రెండోరోజు డాక్టర్ నమ్రతను ఎంక్వైరీ చేసిన పోలీసుల
పద్మారావునగర్, వెలుగు: సికింద్రాబాద్ కోర్టు అనుమతితో సృష్టి ఫెర్టిలిటీ సెంటర్ కేసులో మరో ఇద్దరు నిందితులను గోపాలపురం పోలీసులు శనివారం కస్టడీలోకి తీసుకున్నారు. అక్రమ సరోగసీ, శిశువుల కొనుగోలు, విక్రయం తదితర అభియోగాలకు సంబంధించిన కేసులో ఏ-3 నిందితురాలిగా ఉన్న విశాఖపట్నంలోని సృష్టి టెస్ట్ ట్యూబ్ బేబీ సెంటర్ బ్రాంచి మేనేజర్ సి.కళ్యాణి అచ్చాయమ్మ, ఏ-6 నిందితురాలిగా ఉన్న అస్సాం నివాసి ధనశ్రీ సంతోషిని కస్టడీలోకి తీసుకున్నారు.
సికింద్రాబాద్ గాంధీ ఆసుపత్రిలో వైద్య పరీక్షలు పూర్తయిన అనంతరం ఇద్దరినీ నార్త్ జోన్ డీసీపీ కార్యాలయానికి తరలించి, విచారించారు. రాజస్థాన్ దంపతులకు సరోగసీ పేరుతో ఇచ్చిన బాబు విషయానికి సంబంధించిన అంశంపై పోలీసులు కస్టడీలో పలు ప్రశ్నలు వేసి, సమాధానాలు రాబట్టినట్లు సమాచారం. 5 రోజుల కస్టడీలో సృష్టి సెంటర్ ఓనర్ డాక్టర్ నమ్రతను రెండోరోజు గోపాలపురం పోలీసులు పలు అంశాలపై విచారించారు. రాష్ట్రవ్యాప్తంగా సంచలనం సృష్టించిన ఈ కేసులో అనేక కోణాల్లో విచారిస్తే, మరిన్ని అంశాలు వెలుగులోకి వస్తాయని పోలీసులు భావిస్తున్నారు.
