లింగంపేట, వెలుగు: ప్రభుత్వం పేదలకు అందించే రేషన్ బియ్యంలో యూరియా వచ్చింది. ఈ సంఘటన కామారెడ్డి జిల్లా లింగంపేటలో జరిగింది. గ్రామంలోని లబ్ధిదారులకు ఒకటో నంబర్షాపులో ఆదివారం ఉదయం రేషన్ బియ్యం పంపిణీ చేశారు. కాశీ అనే వ్యక్తి 60 కిలోల బియ్యం తీసుకున్నాడు. ఇంటికి వెళ్లి చూసుకోగా అందులో నాలుగు కేజీల యూరియా వచ్చినట్లు గుర్తించాడు. వెంటనే ఈ విషయాన్ని రేషన్ డీలర్, రెవెన్యూ ఆఫీసర్ దృష్టికి తీసుకెళ్లాడు. కాశీతోపాటు మరో నలుగురుకి పంపిణీ చేసిన బియ్యంలో యూరియా ఉన్నట్లు తెలిసింది. దీనిపై తహసీల్దార్ అమిన్ సింగ్ స్పందిస్తూ యూరియా విషయం తమ దృష్టికి వచ్చిందని.. పరిశీలిస్తున్నామన్నారు. బాధ్యులపై చర్యలు తీసుకుంటామని చెప్పారు.
