ముంబై: విశ్వహిందూ పరిషత్ (వీహెచ్పీ) మహారాష్ట్ర యూనిట్ సంచలన నిర్ణయం తీసుకుంది. ఈ ఏడాది మహారాష్ట్రవ్యాప్తంగా జరగనున్న దుర్గాదేవి నవరాత్రి ఉత్సవాల సందర్భంగా నిర్వహించే గర్బా, దాండియా వేడుకలలో ముస్లింలు పాల్గొనకుండా నిషేధించాలని నిర్ణయించింది. ఈ మేరకు నిర్వాహకులకు గైడ్లైన్స్ జారీ చేసింది. వీహెచ్పీ నిబంధనల ప్రకారం.. వేడుక జరిగే ప్రాంతాల ప్రవేశ ద్వారాల వద్ద ప్రతి ఒక్కరి ఆధార్ కార్డును క్షుణ్ణంగా తనిఖీ చేయాలి. లోపలికి వచ్చే ప్రతి ఒక్కరి నుదుటిపై తిలకం దిద్దాలి.
ఈ వేడుకలకు హాజరయ్యే వారు ముందుగా పూజలో పాల్గొనేలా చూడాలి. వీహెచ్పీ నిర్ణయంపై భిన్నాభిప్రాయాలు వ్యక్తం అవుతున్నాయి. కొందరు ఈ నిర్ణయాన్ని సమర్థిస్తుండగా.. మరికొందరు వ్యతిరేకిస్తున్నారు. హిందువుల పండుగల్లో ముస్లింలకు ఏం పని కొందరు వీహెచ్పీని సపోర్టు చేస్తుండగా.. భిన్నత్వంలో ఏకత్వానికి ప్రతీక అయిన భారతదేశంలో ఇలాంటి నిర్ణయాలు మతపరమైన విభేదాలను సృష్టిస్తాయని కొందరు వ్యతిరేకిస్తున్నారు.
ALSO READ : వేగంగా బలపడుతున్న ఎల్ నినో.. భారత్పై తీవ్ర ప్రభావం..
వీహెచ్పీ కౌంటర్:
నవరాత్రి ఉత్సవాల సందర్భంగా నిర్వహించే గర్భా, దాండియా సాంప్రదాయ వేడుకల్లో ముస్లింలను పాల్గొనకుండా నిషేధించాలన్న నిర్ణయంపై వస్తోన్న విమర్శలకు వీహెచ్పీ కౌంటర్ ఇచ్చింది. గర్బా అనేది కేవలం ఒక నృత్యం లేదా వినోదం మాత్రమే కాదని, అది దుర్గామాతను ఆరాధించే ఒక పవిత్రమైన ప్రక్రియ స్పష్టం చేసింది. విగ్రహారాధనను వ్యతిరేకించే ముస్లింలు ఈ వేడుకలలో ఎందుకు పాల్గొనాలని విమర్శకులను ప్రశ్నించింది. గర్బా పండుగల ముసుగులో జరిగే లవ్ జిహాద్ ఘటనలను నిరోధించడం కూడా ఈ నిర్ణయానికి ప్రధాన కారణాల్లో ఒకటని స్పష్టం చేసింది.
